Рӯзи панҷшанбеи ҳамин ҳафта дар суди ноҳияи Фирдасии пойтахт таҳти раёсати Сурайё Ҷобирова музокироти ҷонибҳо оид ба баррасии даъвои панҷ иттиҳодияи эҷодӣ ва се шахси воқеӣ нисбати нашрияи «Азия-Плюс» ва муҳаррири он Олга Тутубалина доир гардид.
Қабл аз музокирот намояндаи ҳафтавор Иноят Иноятов ба суд маълумот дод, ки ҷониби ҳимоя ба музокирот омода нест, зеро масоили зиёди ошкорнашуда боқӣ монда, бо назардошти ҳолатҳои
дар мурофиаи пешин ошкоршуда
, дархост намуд, ки такроран ташхиси забоншиносӣ гузаронида шавад.
Намояндаи даъвогарон Рустам Устобоев изҳори итимнон кард, ки барои муайян кардани моҳияти як калима дониши олӣ доштан зарур нест ва ҳамчунин зикр кард, ки матни мақола «аз русӣ ба тоҷикӣ тарҷума шуда, сипас ташхис гузаронида шудааст».
Бо вуҷуди ин, баъди бозгашт аз хонаи машваратӣ суд дархости такроран баргузор намудани ташхиси забоншиносиро рад кард.
Дар ҷараёни идомаи мурофиа ҷониби ҳимоя бо мақсади муайян кардани ба фаъолияти зеҳнӣ машғул будани даъвогарони хусусӣ, аз ҷумла пешниҳоди дастурҳои мансабӣ, маълумотнома дар бораи дар кадом мансабу дар куҷо кор кардани онҳо, омода набудани ҳимоя ба музокирот ва ҳамчунин дар мурофиа ҳузур надоштани намояндаи дуюми ҷавобгарон Шуҳрат Қудратов низ дархостҳо пешниҳод кард, вале суд онҳоро бидуни барррасӣ гузошта, ба музокирот пардохт. «Чуин эҳсос мешавад, ки Шумо бо Устобоев ба анҷоми мурофиа шитоб доред», – гуфт Иноятов.
Ба гуфтаи Устобоев, «онҳо далели паҳн кардани маълумоти пастзанандаи обрӯву мартабаи кориро, ки ба даъвогарон зиёни маънавӣ расонидааст, собит кардаанд».
Дар ҳамин ҳол, Иноятов зикр кард, ки даъвогарон «ҳуҷҷатҳоеро, ки зиёни маънавӣ ва моддӣ расонидан ба онҳоро тасдиқ намояд», пешниҳод карда натавонистанд.
Зимнан Устобоев талаб кард, ки ҳафтавори «Азия-Плюс» ва муҳаррири он О.Тутубалина ба рад кардани «маълумоти пастзанандаи шаъну эътибор ва мартабаи корӣ ва маъзарат хостан барои нашри мавод» уҳдадор карда шуда, аз ҳафтавор ва О.Тутубалина дар ҳаҷми 200 ҳазор сомонӣ ҷуброни маънавӣ рӯёнида шавад.
Бо қарори суд, ҷониби ҳимоя рӯзи 17-уми феврал андешаҳои худро баён мекунад. Мушоҳидон тахмин мезананд, ки то ин сана тамоми паҳлӯҳои масъала бояд ҳал шавад. Ба андешаи онҳо, шитобкорӣ дар ин масъала метавонад ба наздикшавии санаи вохӯрии зиёиён бо президент Эмомалӣ Раҳмон вобаста бошад, ки маъмулан нимаи моҳи март баргузор мешавад.
