Зимни кори як мизи гирд дар Душанбе рӯзи чоршанбеи ҳамин ҳафта дурнамои узвияти Тоҷикистон ба Созишнома дар бораи транзит ва савдои АРТТА баррасӣ шуд.
Муовини раиси Палатаи савдо ва саноати ҶТ Ларис Кислякова дар ин робита изҳор намуд, ки соли 2010 Афғонистону Покистон Ёдоошти тафоҳум оид ба Созишнома дар бора транзит ва савдои АРТТА-ро ба имзо расониданд.
«Ҳамроҳшавии Тоҷикистон ба ин созишнома ба таъмини хуруҷи мустақими транзит барои бахши хусусии ҷумҳурӣ ба Хиндустон, бандарҳои Гвадар ва Қарочӣ дар Покистон бо хароҷоти камтарин ва коҳиши вақти ҳамлу нақли маҳсулот тариқи қаламрави кишварҳо, коҳи арзиши боркашонии транзитӣ, соддашавӣ ва ягонагии тартиботи ҳамлу нақл (аз ҷумла гумрукӣ)-и транзитӣ мутобиқи созишномаҳои байнулмилалии қабулшуда ва меъёрҳои он мусоидат мекунад», – иброз дошт Кислякова.
Муовини раиси ПСС Тоҷикистон зикр кард, ки ин иқдом ҳамчунин ба беҳбуди бахшҳои калидии иқтисод, афзоиши ҳаҷми муомилоти молӣ дар долонҳо (коридорҳо)-и транзитӣ, болоравии рақобатпазирии содироти ҷумҳурӣ низ мусоидат намуда, ҷиҳати гузаштан ба сатҳи сифатан нави муносибатҳои тиҷоративу иқтисодӣ, аз ҷумла инкишофи зербинои нақлиётии фаромарзии кишварҳои Осиёи Марказӣ имкони мусоид фароҳам меоварад.
«Созишномаи мазкур минбаъд метавонад дар дигар кишварҳои ҳамсоя низ мавриди амал қарор гирифта, ба рушди савдои фаромарзӣ, коҳиши монеъаҳо ва роҳандозии ҳамкориҳои гуногуншакли тиҷоративу иқтисодӣ миёни кишварҳо такони ҷиддӣ бахшад», – афзуд Кислякова.
