Аввали ҳафтаи равон зимни ҷаласаи нахустини комиссия оид ба нақлиёти Тоҷикистону Белорус дар Душанбе, ки ба ҳайати он намояндагони Вазоратҳои нақлиёти ҳарду кишвар шомиланд, масъалаҳои ҳамкории минбаъда баррасӣ шуданд.
Аз Вазорати нақлиёти ҶТ ба «Азия-Плюс» дар ин робита иттилоъ доданд, ки ҷонибҳо атрофи масъалаҳои марбут ба созишномаи мавҷудаи байниҳукуматии соли 2000-ум баимзорасида «Дар бораи мухобироти байнулмилалии автомобилӣ, мусофиркаш ва боркаш миёни Тоҷикистону Белорус» ибрози назар карданд.
«Созишнома бо мақсади осонкунӣ ва танзими ҳамлу нақли автомобилии бору мусофирон миёни ҳарду кишвар ва транзит тариқи қаламрави онҳо дар асоси барорбарҳуқуқӣ ва барои тарафайн судманд ба имзо расидааст», – гуфтанд дар вазорат ва илова намуданд, ки дар анҷоми ҷаласа Протокол ба имзо расид.
Дар Созишномаи мазкур зикр мегардад, ки муқаррароти он ба ҳамлу нақли воситаҳои нақлиёти автомобилии мусофирбар ва боркаши дар қаламрави яке аз кишварҳо сабтшуда мавриди амал қарор дода мешавад.
