Кумитаи байнидавлатии омори Иттиҳоди Давлатҳои Мустақил (ИДМ) маълумот дар бораи музди меҳнати миёнаи номиналӣ дар кишварҳои Иттиҳод дар моҳи феврали соли равонро интишор намуд.
Моҳи феврали соли ҷорӣ музди меҳнати пасттарин миёни кишварҳои ИДМ дар Тоҷикистон ба қайд гирифта шудааст, ки 175 доллари ИМА-ро ташкил медиҳад. Зикр мегардад, ки тайи шаш соли ахир музди меҳнати миёнаи номиналӣ дар Тоҷикистон қариб 4 баробар (аз 215 сомонии моҳи феврали соли 2008 то 820 сомонӣ дар моҳи феврали соли 2014) афзудааст.
Дар ин моҳ музди меҳнати аз ҳама баландтарин дар Русия – 820 доллари ИМА ба қайд гирифта шудааст. Моҳи феврали соли ҷорӣ музди меҳнати миёнаи номиналӣ дар Қазоқистон – 575 $, Озарбойҷон – 545 $, Белорус – 540 $, Арманистон – 380 $, Украина – 355 $, Молдова – 275 $ ва Қирғизистон – 200 $-ро ташкил додааст. Дар бораи музди меҳнати миёнаи номиналӣ дар моҳи феврали соли равон дар Ӯзбекистону Туркманистон маълумот дода намешавад.
