Душанбе. 30-уми июл. ОИ «Азия-Плюс» – Муовини
сармуҳандиси
ширкати саҳомии холдингии кушодаи «Барқи тоҷик»
Рустам Раҳимов
ба рӯзноманигорон изҳор дошт, ки дар ҷумҳурӣ ҷорӣ кардани реҷаи маҳдуди истифодаи барқ шояд аз моҳи август оғоз гардад ва ширкат бо чунин дархост ба ҳукумат муроҷиат кардааст.
«Агар пешниҳоди моро ҳукумат маъқул шуморад, аз моҳи август тартиби аз рӯи меъёр истифода намудани барқ шабона ҷорӣ хоҳад шуд», – таъкид сохт ӯ.
Дар мавриди шарҳи мавзӯъ
Рустам Раҳимов
зикр кард, ки айни замон сатҳи оби обанбори «Норак» нисбат ба ҳамин давраи соли гузашта
11 метр
поинтар аст. «Дар сурати наандешидани чораҳои зарурӣ, то оғози мавсими тирамоҳу зимистон сатҳи он метавонад то
16 метр
поинтар фарояд», – афзуд муовини
сармуҳандис
.
Ёдрас мекунем, ки вазири энергетика ва саноати Тоҷикистон Гул Шералӣ дар нишасти матбуотӣ изҳор дошта буд, ки меъёри истифодаи барқ дар Тоҷикистон пас аз 9-уми сентябр ҷорӣ мегардад.
Ҳамчунин 18-уми июн зимни вохӯрӣ бо кормандони соҳаи энергетика президенти Тоҷикистон Эмомалӣ Раҳмон пешниҳод карда буд, ки меъёри истифодаи нерӯи барқ дар Тоҷикистон на дар фасли зимистон, балки тирамоҳ, аз 1-уми сентябр ҷорӣ карда шавад.
Вазир зикр карда буд, ки ба иллати хушксолӣ ва камобии имсола Тоҷикистонро зарурат пеш омадааст, ки дар обанбори Норак оби кофӣ захира намояд.
Ба қавли Г.Шералӣ, то ахири моҳи август мизони об дар обанбори Норак бояд ба
908 метр
расад ва ин дар ҳолест, ки айни замон ҷараёни воридшавии об ба обанбор ҳудуди 1-1,2 ҳазор метри мукааб дар як сонияро ташкил медиҳад.
«Захира кардани об бояд бо дарназардошти баргардонидани қарзи нерӯи барқи кишвар ба Ӯзбекистон амалӣ гардад», – гуфт ӯ ва афзуд, ки феълан дар Тоҷикистон дар як шабонарӯз ҳудуди 63-64 млн. кВт/соат нерӯи барқ истеҳсол мегардад ва аз ин миқдор 11 млн. кВт/соат ба Ӯзбекистон ва 1 млн. кВт/соат ба Қирғизистон интиқол дода мешавад.
