Душанбе. 29-уми июл. ОИ «Азия-Плюс» – Дар нишасти матбуотӣ вазири корҳои дохилии Тоҷикистон Маҳмадназар Солеҳов изҳор дошт, ки тайи шаш моҳи соли равон дар Тоҷикистон 6 ҳазору 333 ҷиноят ба қайд гирифта шуд, ки нисбат ба ҳамин давраи соли гузашта ба миқдори 290 ҷиноят ё худ 4,4 дарсад камтар аст.
Чунин тамоили мусбатро вазир ба он марбут медонад, ки дар ҷумҳурӣ вазъи сиёсӣ мӯътадил гашта, талаботи мақомоти ҳифзи ҳуқуқ оид ба ошкор сохтани ҷиноётҳо пурзӯр гаштааст.
«Теъдоди ҷиноёти дуздӣ – 11,5, дуздии молу амволи манзили зист – 48,5, ҷиноёти вазнин – 2, ғоратгарӣ – 17,4, одамкушӣ – 1,5, барқасдона зарари ҷисмонӣ расонидан – 7,5 ва содир намудани ҷиноят бо силоҳи оташфишон 45 дарсад коҳиш ёфтааст», – гуфт М.Солеҳов.
Тибқи маълумоти вазорат, мизони ошкорсозии ҷиноятҳо ба андозаи 2,8 дарсад афзуда 85,6 фоизро ташкил медиҳад.
