Аз 16 то 20 июни соли 2014 дар дар шаҳри Москва ҷаласаи 20-уми Пленарии Гурӯҳи Авруосиё дар самти муқовимат ба қонунигардонии даромадҳои бо роҳи ҷиноят бадастоварда ва маблағгузории терроризм баргузор гардид.
Бино ба иттилои хадамоти матбуоти Бонки миллии ҷумҳурӣ, дар соли 2008 Тоҷикистон баъди баҳогузории Бонки Ҷаҳонӣ бинобар мутобиқ набудани қонунгузории ҷумҳурӣ ба тавсияҳои Гурӯҳи татбиқи чораҳои молиявии муқовимат ба шустани пул (ФАТФ) ва мавҷуд набудани мақоми махсуси ваколатдор дар ин самт таҳти реҷаи “мониторинги қатъӣ”-и Гурӯҳи Евросиё қарор гирифт.
Ба иттилои манбаъ, барои баромадан аз ин реҷаи махсус тибқи тартиби кории Гурӯҳи мазкур ҷумҳурӣ соле ду маротиба дар ҳар як ҷаласаи Гурӯҳи Евросиё ҳисоботи муфассалро доир ба корҳои иҷрошуда пешниҳод менамуд ва ин ҳисобот аз ҷониби котиботи ин Гурӯҳ баррасӣ ва баҳогузорӣ мегардид.
Гуфта мешавад, ҳисоботи муфассали сесолаи ҷумҳурӣ дар ҷаласаи навбатӣ аз ҷониби коршиносон – баҳогузорон муҳокима гардид. Тибқи хулоса ҳисоботи ҷумҳурӣ бинобар мутобиқ гардидани қонунгузории Ҷумҳурии Тоҷикистон ба тавсияҳои ФАТФ ва амалан мавриди истифода қарор гирифтани онҳо қобили қабул шуморида шуда, мусбат арзёбӣ гардид.
Зимнан зикр мегардад, ки дар натиҷаи корҳои басомонрасонида шуда, мутобиқи изҳороти умумии ҷаласаи Пленарии 20-уми Гурӯҳи Евросиё Ҷумҳурии Тоҷикистон аз таҳти реҷаи “мониторинги қатъӣ” бароварда шуда, ба реҷаи “мониторинги муқаррарӣ” дохил карда шуд.
