Зимни баррасии масъалаи созишномаи қарзӣ миёни Тоҷикистон ва Бонки исломии рушд аз рӯи лоиҳаи «Таҷдиди зеристгоҳи барқии «Равшан» дар Тоҷикистон» дар муҳокимаи парлумонӣ, муовини вазири молияи ҷумҳурӣ Ҷамолиддин Нурлиев изҳор намуд, ки аз 1-уми июли соли ҷорӣ тарифҳои истифодаи барқ дар Тоҷикистон ба андозаи 15% зиёд мешаванд.
Ба саволи вакили палатаи поёнии парлумон доир ба ин ки оё ин созишнома ба муфлисшавии ширкати «Барқи тоҷик», ки бе ин ҳам қарзи зиёд дорад, боис намегардад, Нуралиев посух дод, ки бо мақсади беҳбуди вазъи ширкати мазкур, мутобиқи қарори ҳукумат, аз 1-уми июл афзудани тарифҳои истифодаи барқ ба андозаи 15% пешбинӣ шудааст.
Ёдрас мекунем, ки бори ахир тарифҳои истифодаи нерӯи барқ дар Тоҷикистон моҳи апрели соли 2012 боло рафта буданд. Қаблан Бонки ҷаҳонӣ ба Тоҷикистон тавсия дода буд, ки тарифҳои истифодаи нерӯи барқ тадриҷан то 3,5 сент расонида шаванд.
Айни замон бо назардошти андоз аз арзиши изофа, тарифҳои истифодаи нерӯи барқ барои аҳолӣ барои 1 кВт/соат – 11 дирам; истеъмолгарони саноатӣ ва ғайрисаноатӣ – 26,63; истеъмолгарони соҳаи буҷетӣ, бахши коммуналӣ, нақлиёти энергетикӣ ва маҷмааҳои варзишӣ – 10,63 ва заҳбурҳои амудии мелиоративӣ ва пойгоҳҳои обкашӣ – 1,88 дирам муқаррар карда шудаанд.
Дар доираи созишномаи қарзӣ миёни Тоҷикистон ва Бонки исломии рушд аз рӯи лоиҳаи «Таҷдиди зеристгоҳи барқии «Равшан» дар Тоҷикистон» ба муҳлати 25 сол бо 2,5%-и солона дар ҳаҷми 14,5 млн. доллари ИМА қарз ҷудо карда мешавад.
