Вазорати корҳои дохилии Тоҷикистон оид ба ҳодисаи сӯхтор дар маркази савдои «Шаҳбоз»-и шаҳри Кӯлоб гузориши расмӣ интишор намуд.
Дар гузориш зикр мегардад, ки рӯзи 22.07.с.2014, тахминан соати 00:15-дақиқа, дар Маркази савдои «Шаҳбоз»-и шаҳри Кӯлоб сӯхтор ба амал омада, соати 00:39-дақиқа ба маркази нуқтаи алоқаи Шӯъбаи хадамоти давлатии оташнишонии минтақаи Кӯлоб хабар расид. Барои хомӯш намудани сӯхтор 18-адад автомашинаи оташнишонӣ, 2-адад мотопомпаҳои қисмҳои оташнишонии шаҳру ноҳияҳои минтақаи Кӯлоб ва 4-адад мошинҳои обкаши шаҳри Кӯлоб сафарбар карда шудаанд.
Масоҳати умумии сӯхтор 965 метри мураббаъ, зиёда аз 90 нуқтаи савдоро ташкил медиҳад. Сабаби сӯхтор расиши кӯтоҳи ноқилҳои барқӣ дар мағозаи маркази савдои «Шаҳбоз» мебошад. Зарар аз сӯхтор муайян карда мешавад. Молу авмоли наҷотдодашуда ба маблағи зиёда аз 82000000 сомониро ташкил медиҳад.
Аз тарафи кормандони гурӯҳи назорати давлатии бехатарӣ аз сӯхтори шаҳри Кӯлоб оиди ҳолати бехатарӣ аз сӯхтори маркази савдои «Шаҳбоз» як қатор чорабиниҳо андешида шудааст. Чунончи: амрнома иборат аз 19 банди чорабиниҳо аз 18.01.с.2014 ба директори маркази савдо Ризоев Рашид Разоқович соли таваллудаш 1975, барои иҷроиш пешниҳод карда шудааст. Барои вайрон ва иҷро накардани чорабиниҳои бехатарии зидди сӯхтор нисбати директори маркази савдо Ризоев Р.Р. протоколи ҳуқуқвайронкунии маъмурӣ аз 20.01.с.2014 тартиб дода ба маблағи 600 сомонӣ ҷаримабандӣ карда шуда, инчунин нисбати 10-нафар соҳибкорони маркази савдои «Шаҳбоз» протоколҳои маъмурӣ тартиб дода шуда, ба маблағи 1200 сомонӣ ҷаримабандӣ карда шуда, 1 дӯкони савдо ва 4 нуқтаи барқие, ки хавфи сар задани сӯхторро доштанд аз манбаи барқ ҷудо карда шудааст.
Дар баробари ин ба унвони раиси Раёсати ҷамъияти матлуботи ноҳияи Кӯлоб Ҳакназарова З., ки аз моҳи июни соли ҷорӣ ба вазифа таъин шудааст, амрнома бо 25 банд аз 02.06.с.2014 барои иҷроиш пешниҳод карда шуда, нисбати вайронкунандагони қоидаҳои бехатарӣ аз сӯхтор 43 протоколҳои маъмурӣ тартиб дода шуда, ба маблағи 5240 сомонӣ ҷаримабандӣ карда шудааст. Инчунин қарор дар бораи боздоштани сохтмони мағозаҳо дар бозори «Саховат» аз 03.07.соли 2014 қабул карда шуда, амалӣ гардонида шудааст.
Барои таъмин намудани тартиботи ҷамъиятӣ ҳайати шахсии ҚМ РВКД дар Вилояти Хатлон 86-нафар, ШВКД дар шаҳри Кӯлоб 110-нафар, ДТММ (бо қароргоҳ дар шаҳри Кӯлоб) 60-нафар, қисми ҳарбии 5403 Қӯшунҳои дохилии ВКД Ҷумҳурии Тоҷикистон, гурӯҳи фаврии КДАМ вилояти Хатлон 40-нафар, ҳамагӣ – 426 нафар кормандони мақомоти корҳои дохилӣ сафарбар карда шуданд.
Ба ҷои ҳодисаи сӯхтор сардори СХДО ВКД Ҷумҳурии Тоҷикистон генерал-майор Шарипов М., сардори ҚМ РВКД минтақаи Кӯлоб полковники милитсия Искандаров А. ва Раиси шаҳри Кӯлоб Раҳмонов А. сари вақт омада, чорабиниҳоро роҳбарӣ кард.
