То ба имрӯз ба ҷуз вилояти Суғд, дигар минтақаҳои кишвар нақшаи даъват ба хизмати ҳарбиро иҷро карданд.
Сардори маркази матбуоти Вазорати мудофиаи Тоҷикистон Фаридун Маҳмадалиев ба «Азия-Плюс» дар ин робита иттилоъ дод, ки то кунун ВМКБ, вилояти Хатлон, ноҳияҳои тобеи марказ ва шаҳри Душанбе нақшаи даъват ба хизмати ҳарбиро ба иҷро расониданд. «Дар саросари кишвар нақшаи даъват то имрӯз 98% иҷро шуд», – иброз дошт ӯ.
Ба гуфтаи ӯ, танҳо шаҳри Панҷакент ва ноҳияҳои Бобоҷон Ғафурову Мастчоҳи вилояти Суғд то ҳол нақшаи даъвати тирамоҳӣ ба хизмати ҳарбиро иҷро накардаанд.
Дар ҳамин ҳол, Маҳмадалиев изҳори итминон кард, ки рӯзи душанбеи ҳафтаи оянда, 17-уми ноябр маъракаи даъват ба хизмати ҳарбӣ дар ҷумҳурӣ ба итмом мерасад.
Ёдрас мекунем, ки мутобиқи фармони президенти кишвар, маъракаи даъвати тирамоҳӣ ба хизмати ҳатмии ҳарбӣ дар сафи Қувваҳои Мусаллаҳи Тоҷикистон 1-уми октябр оғоз гардида, 30-юми ноябри соли равон ба итмом мерасад. Ба хизмати ҳатмии ҳарбӣ шаҳрвандони синнусоли аз 18 то 27-сола, ки барои мавқуф гузоштани хизмат ё озод шудан аз он ҳуқуқ надоранд, даъват карда мешаванд.
Қобили зикр аст, ки ҳамасола ба хизмат дар сафи Қувваҳои Мусаллаҳи кишвар тақрибан 15-16 ҳазор нафар даъват карда мешаванд. Дар Тоҷикистон зиёда аз 600 ҳазор нафар ҷавонони синнусоли мувофиқ ба хизмати ҳарбӣ ба сар мебаранд, аммо ҳудуди 150 ҳазор нафари онҳо мӯҳлати хизматашонро мавқуф гузоштаанд ё аз хизмат озод карда шудаанд ва ё барои хизмати ҳарбӣ коршоям нестанд. Боз ҳудуди 100 ҳазор нафар шаҳрвандони синнусоли мувофиқ ба хизмати ҳарбии Тоҷикистон дар муҳоҷирати корӣ қарор доранд.
Қувваҳои Мусаллаҳи Тоҷикистон аз се навъи ҷузъу том – Қушӯнҳои зудамал, хушкигард, Қувваҳои ҳарбӣ-ҳавоӣ ва мудофиаи зидди ҳавоӣ иборат аст.
