Марҳабо Ҷабборӣ муовини нахуствазири кишвар ва раиси ситоди ҷумҳуриявӣ оид ба омодагӣ ва баргузории чорабиниҳо бахшида ба 700-солагии мутафаккири бузурги Шарқ Мир Сайид Алии Ҳамадонӣ имрӯз ба шаҳри Кӯлоб омад.
Муовини раиси шаҳри Кӯлоб Нуриддин Бозоров ба «Азия-Плюс» дар ин робита иттилоъ дод, ки маблағи барномаи ташкили чорабиниҳо бахшида ба ин ҷашн, ки аз ҷониби ҳукумат тасдиқ шудааст, 9 млн. 366,9 сомониро ташкил медиҳад.
Ба қавли ӯ, аз ин миқдор маблағ 7 млн. 320,5 ҳазор сомониро буҷети ҷумҳуриявӣ, 1 млн. 805 ҳазор сомониро буҷети шаҳҳри Кӯлоб ҷудо карда, 241,4 ҳазор сомонӣ маблағҳои ҷалбшудаи соҳибкорони маҳаллӣ мебошад ва қисмати бештари воситаҳо – 5 млн. 850 ҳазор сомонӣ ба куллан азнавсозии боғи фарҳангу истироҳати шаҳр равона мегардад, ки дар он маҷмааи осорхонаи Мир Сайид Алии Ҳамадонӣ воқеъ аст.
«Бо иштироки намояндагони ЮНЕСКО симпозиуми байнулмилалӣ доир гардида, як қатор китобҳо нашр мешаванд. Ҳамчунин намоишномаи Театри мусиқиву драмавии ба номи С.Вализода таҳия гардида, бахшида ба ҷашн боз як қатор чорабиниҳои дигар гузаронида мешаванд», – қайд кард Бозоров.
Зимнан зикр гардид, ки муовини нахуствазир аз ҳама иншооти мавриди сохтмон қарордошта, боздид намуда, дақиқан муҳлати иҷрои корҳо бо барномаи тасдиқшударо санҷид ва сипас эродҳои худро дар маҷлиси умумии фаъолони шаҳр бо иштироки намояндагони ташкилотҳои паймонкор изҳор намуд.
