– Айни замон дар қаламрави Сурия тақрибан 300 нафар шаҳрвандони Тоҷикистон дар амалиёти ҷангӣ дар ин кишвар ширкат доранд, – хабар медиҳад радиои «Озодӣ» бо истинод ба муовини раиси Кумитаи давлатии амнияти миллӣ (КДАМ)-и Тоҷикистон Акрам Амонов.
Зимни суханронӣ дар музокироти парлумонӣ санаи 21-уми ноябр А.Амонов дар ин робита изҳор намудааст, ки шаҳрвандони Тоҷикистон ба амалиёти ҷангӣ дар Сурия тариқи қаламрави Русия ва Афғонистон сафарбар мешаванд ва яке аз нуқтаҳои сафарбарии ҷангиён ба Сурия дар шаҳри Маскав, хиёбони сулҳ воқеъ аст.
Қаблан ҳукуматдорони Тоҷикистон изҳор дошта буданд, ки дар амалиёти ҷангӣ дар қаламрави Сурия ҳудуди 200 нафар шаҳрвандони кишвар ҳузур доранд ва дар ин даргириҳо ҳадди ақал 50 нафар шаҳрвандони Тоҷикистон ба ҳалокат расидаанд.
Дар ҳамин ҳол, раиси палатаи поёнии парлумони ҷумҳурӣ Шукурҷон Зуҳуров зимни музокироти парлумонӣ фаъолияти хадамоти муҳоҷирати Тоҷикистонро мавриди интиқод қарор дод. Дар ин робита ӯ изҳор дошт: «Фаъолияти хадамоти муҳоҷират дар Русия ғайриқаноатбахш аст. Дар бораи ҳалокат ва риоя нашудани ҳуқуқҳои шаҳрвандони Тоҷикистон дар Русия хабарҳои зиёд мерасанд. Аскари шаҳрвандон аз қаламрави ин кишвар хориҷ карда мешаванд».
