Дар конфронси Ҳизби коммунисти Тоҷикистон (ҲКТ) аз ҳавзаи якмандатии интихоботии Истравшан раиси ин шаҳр Иброҳим Абуллозода номзад ба вакилӣ дар парлумон пешбарӣ шуд.
Раиси ҲКТ Шодӣ Шабдолов ба «Азия-Плюс» дар ин робита иттилоъ дод, ки Иброҳим Абдуллозода имрӯз ягона узви ҳизб аст, ки ба ҳайси раиси шаҳр фаъолият дорад.
Дар ҳамин ҳол, бино ба иттилои сухангӯи Ҳизби халқии демократии Тоҷикистон Усмон Солеҳ конфронси ҳизб Гулнора Бобоева, роҳбари Раёсати илм ва маорифи дастгоҳи президенти кишварро аз ҳавзаи интихоботии Исмоили Сомонии шаҳри Душанбе номзад ба вакилӣ дар Маҷлиси намояндагон пешбарӣ кардааст.
«Имрӯз конфронси муштараки бахшҳои ҲХДТ дар ноҳияи Ғончӣ ва шаҳри Истаравшан ҳамчунин раиси ноҳияи Ғончӣ Зуфар Исмоилзодаро номзад ба вакилӣ пешбарӣ намуд», – иброз дошт ӯ.
Аз Кумитаи иҷроияи ҲХДТ дар вилояти Суғд ба «Азия-Плюс» иттилоъ доданд, ки пагоҳ аз шаҳри Конибодом низ намояндаи ҳизб номзад ба вакилӣ пешбарӣ мешавад.
