Соли 2015-ро раиси вилояти Суғд Абдураҳмон Қодирӣ соли рушди фарҳанг эълон карда, дар ин замина яке аз аввалин қарори раиси вилоят дар бораи таъсиси Корхонаи воҳиди давлатии «Киностудияи «Суғд синамо» аз санаи 14-уми январи соли 2015 ба тавсиб расид.
Бино ба маълумоти хадамоти матбуоти раиси вилояти Суғд, ҳадаф аз тасвиби қарори мазкур рушду нумӯи ҳамаҷонибаи санъати филмофарӣ, таҷассум намудани филмномаҳои баландмазмун, пур намудани фазои холии синамои тоҷик ва муаррифӣ намудани Тоҷикистон тариқи филмҳои хуб барои ҷаҳонинён мебошад.
Гуфта мешавад, чунин иқдом дар минтақаҳои кишвар бори аввалин дар вилояти Суғд амалӣ гардида, киностудия бо пешниҳоди як гурӯҳ филмофарони ҷавони боистеъдоди вилоят ва дастгирии бевоситаи раиси вилоят ба фаъолият оғоз хоҳад кард.
Зимнан зикр мегардад, ки КВД «Киностудияи «Суғд синамо» дар заминаи театри давлатии ба номи Тӯҳфа Фозиловаи шаҳри Конибодом фаъолияташро ба роҳ монда, коргардони ҷавони тоҷик Муҳиддин Ҷӯраев директори «Суғд синамо» таъин гардидааст.
