Ду сокини шаҳри Қӯрғонтеппа дар ҷангҳои Сурия ширкат доранд. Дар ин бора и.в раиси шаҳри Қӯрғонтеппа Амирулло Асадулло зимни нишасти матбуотӣ хабар дод.
Ба гуфтаи ӯ, сабаби гаравиши ҷавонон ба ҳизбу ҳаракатҳои экстремистӣ камии роҳандозии корҳои фаҳмондадиҳӣ ва норасоии ҷойҳои корӣ низ мебошад.
«Мо байни ҷавонон корҳои фаҳмондадиҳӣ кам мегузаронем ва ба хотири пешгирии гаравиши онҳо дар ин самт дар ҳамдастӣ кор кардан зарураст. Бо ҷавонон вохӯрию суҳбатҳоро бештар намоем ва ташвиқу тарғиби қонуни ҶТ «Дар бораи масъулияти падару модар дар таълиму тарбияи фарзанд»-ро бештар намоем», – гуфт ӯ.
Амирулло Асадулло ҳамчунин қайд кард, ки тайи ҳафт моҳи фаъолият бо шаҳрвандон мулоқоту сӯҳбатҳои зиёде сурат гирифта, имрӯз натиҷаи он дар коҳиши қонунвайронкуниҳо аз тарафи наврасону ноболиғон ба мушоҳида мерасад.
Бояд гуфт, ки қаблан прокуратураи вилояти Хатлон хабар дода буд, ки як сокини шаҳри Қӯрғонтеппа Муродалӣ Барфиев дар ҷангҳои Украина ширкат намуда, ба ҳалокат расидааст ва ҷасади ӯ ба Қӯрғонтеппа интиқол ёфтааст.
