Дар шаҳри Қӯрғонтеппа кормандони Раёсати Агентии назорати маводи нашъаовари назди Президенти Ҷумҳурии Тоҷикистон дар вилояти Хатлон дар таъмиргоҳи нақлиёт мошинаи тамғаи “БМВ”-ро, ки ба сокини ноҳияи Бохтар таалуқ дошт, аз назар гузарониданд.
Бино ба иттилои шуъбаи робита бо ҷомеаи Агентӣ, дар дохили автомашина зери дастаи ивазкунии суръат як бастаи селлофанӣ бо маводи ҷигариранг ошкор гардида, мутахассисони Шуъбаи Экспертизаи судии РАНМН дар вилояти Хатлон муайян намуданд, маводи мусодирашуда афюн мебошад.
Гуфта мешавад, соҳиби автомашина нишон дод, ки афюнро аз сокини дигари ноҳияи Бохтар харидорӣ намудааст. Айни ҳол барои муайян ва дастгир намудани фурӯшандаи афюн чорабиниҳои оперативӣ андешида шудаанд.
Зимнан зикр мегардад, ки аз рӯи ҳодисаи мазкур парвандаи ҷиноӣ оғоз гардида, тафтишот дар ин самт давом дорад.
