Додгоҳи ноҳияи Исмоили Сомонии шаҳри Душанбе як сокини шаҳри Кӯлобро ба иттиҳоми фаъолият дар ташкилоти экстремистӣ, ғайриқонунӣ нигаҳдории яроқ ба 12 соли зиндони низомаш пурзӯр маҳкум кард.
Додгоҳи Исмоили Сомонии шаҳри Душанбе Амрохон Эргашови 41-соларо мутобиқи се моддаи Кодекси ҷиноии ҶТ 307 қисми 2, (Ташкили фаъолияи ташкилоти экстремистӣ (ифротгароӣ), 187 қисми 2 (Ташкили иттиҳоди ҷиноятӣ (ташкилоти ҷиноятӣ),195 қисми 3 (Ғайриқонунӣ соҳиб шудан, ба дигарон додан, ба соҳибияти каси дигар додан, нигоҳ доштан, интиқол додан гирифтани яроқ, лавозимоти ҷангӣ, моддаҳои тарканда ва воститаҳои таркиш) гунаҳкор эътироф намуд. Бо назардошти мавриди қонуни афв қарор гирифтан, сеяки муҳлати ҷазои ӯ кам карда мешавад.
Зимни қироати ҳукм судя Раҷабзода Ҳотам қайд кард, Амрохон Эргашев соли 2005 дар «Ҷамоати таблиғ»-и шаҳри Райванди Давлати Исломии Покистон таълимоти динии равияи «Таблиғ»-ро омӯхта, бо мақсади паҳн намудани ин таълимот ба Ҷумҳурии Тоҷикистон бармегардад ва дар масҷидҳои шаҳрҳои Кӯлоб ва Душанбе ба шаҳрвандон Фаёзов Бахтиёр Хайруллоевич, Юсуф, Билол, Сафар ва дигар шаҳрвандони шахсияташон номаълум ва дар байни омма таълимоти динии равияи манъшударо паҳн намуда, барои шомил шудан ба ин ҷамъият даъват намудааст. Бо қарори Суди Олии Тоҷикистон «Ҷамъияти таблиғ» ҷамъияти террористӣ ва экстремистӣ (ифротгароӣ) эътироф карда шуда, фаъолияташ дар ҳудуди Тоҷикистон манъ аст.
Ғайр аз ин, ӯ соли 2009 ӯ дар иштирок дар амалиётҳои ҷангӣ ба муқобили сохти констутсионии Тоҷикистон дар ноҳияҳои Дарвоз ва Тавилдара, нигаҳдорӣ ва интиқоли аслиҳаи оташфишон, узвият дар гурӯҳҳои ҷиноятпеша, аз қабили гурӯҳҳои муташаккили Раҳимов А. ва Азизов Н.С., ки ин иттиҳоди ҷиноятиро бо мақсади бо роҳи эълон намудани ҷиҳод ғасб намудани ҳокимияти давлатӣ дар Тоҷикистон аз ҳисоби собиқ тарафдорони қувваҳои мухолифин созмон додаанд, гумонбар дониста мешуд. Пас аз ин аз соли 2009 то инҷониб дар шаҳри Бишкеки Ҷумҳурии Қирғизистон паноҳ бурда, миёнаҳои моҳи ноябри соли 2014 аз ҷониби мақомотҳои дахлдори Ҷумҳурии Қирғизистон ба Тоҷикистон истирдод (депортатсия) шудааст.
Ҳарчанд судшаванда Эргашов Амрохон қисман гуноҳашро дар содир намудани ҷиноятҳо эътироф карда бошад ҳам, гуноҳи ӯ дар ҷараёни тафтишот ва мурофиаи судӣ бо нишондоду баёноти шоҳидон ва ваҷҳу далелҳо пурра собит шуд.
Бино ба иттилои Кумита оид ба корҳои дин, танзими анъана ва ҷашну маросимҳои миллии назди ҳукумати Тоҷикистон, айни замон дар макотиби олии исломии кишварҳои хориҷӣ ҳамагӣ 158 нафар донишҷӯёни тоҷик боқӣ мондаанд. «Донишҷӯёне, ки ба ватан баргардонида шуданд, дар муассисаҳои таълимоти динии кишварҳои Эрон, Арабистони Саудӣ, Либия, Миср ва Покистон таҳсили илм мекарданд.
Кумита бо Вазорати корҳои дохилӣ дар ин самт ҳамкорӣ дорад, то ки ҷавононро аз донишгоҳҳои хориҷӣ ба ватан баргардонад. «Ҳамин тариқ, бо супориши президент аз соли 2010 то ба имрӯз ба ҳукумати ҷумҳурӣ муясссар гардид, ки аз 3054 нафар донишҷӯёни тоҷики дар кишварҳои хориҷӣ бо ихтисосҳои динӣ таҳсилдошта 2896 нафарашонро ба ватан баргардонад», – гуфтанд дар Кумита.
