Кумита оид ба корҳои дин, танзими анъана ва ҷашну маросимҳои миллии назди ҳукумати ҶТ ба маълумоти дар чанде аз ВАО интишоршуда дар бораи бидуни сабаби ҷиддӣ аз ҷониби тоҷикистониён пардохт шудани маблағи зиёдтар барои адои маросими ҳаҷ нисбати зойирини кишвари ҳамсояи Қирғизистон розӣ нест.
Дар
маълумоти
дар ин робита нашршудаи Кумита зикр мегардад, ки соли гузашта зоирини қирғиз барои сафар ба Арабистони Саудӣ 2 ҳазору 550 доллари ИМА ва тоҷикон бошанд, 18 ҳазору 165 сомонӣ, яъне тибқи қурби ҳамон замон қариб 3 ҳазору 700 доллари ИМА маблағ пардохт намуданд.
Маблағи тоҷикистониён ба чиптаи ҳавопаймо, сукунат дар меҳмонхонаҳо дар шаҳрҳои Макка ва Мадина, се маротиба хӯрок дар як рӯз, хидмати роҳбаладон, суғурта, хизматрасонии шабонарӯзии тиббӣ, эмгузаронӣ бар зидди бемориҳои сирояткунанда, ҷузвдон, сару либос, чорво барои қурбонӣ ва ғайра масраф гардид.
Гуфта мешавад, нисбат ба зоирини тоҷик, қирғизҳо ба таври ройгон дар маконҳои хайрия зиндагӣ карда, чорво барои қурбониро низ аз ҳисоби алоҳида аз Арабистони Саудӣ мехариданд.
Зимнан зикр мегардад, ки зоирини қирғиз барои ташкили адои маросими ҳаҷ ба мақомоти дахлдори кишвари худ 130 доллар пардохт мекунанд ва ин ҳам дар ҳолест, ки зойирини тоҷик чунин хароҷот надоранд.
Ғайр аз ин, ҳоҷиёни тоҷик дар меҳмонхонаҳои барҳавои Макка (дар ҳар утоқ аз 3 то 5 нафар) дар масофаи то 4 км аз Ҳарам иқомат намуда, қирғизҳо дар дурии 15 километр аз он зиндагӣ мекарданд.
Кумита итминон медиҳад, ки ҳоло хизматрасониҳое, ки ҷониби Тоҷикистон баъди бастани шартномаи дахлдор бо ширкати хизматрасон ба зоирини худ пешниҳод менамояд, дар сатҳи кишварҳои пешрафтае чун Туркияву Эрон, Русияву Қазоқистон ва Озарбойҷон аст, ки нисбат ба Тоҷикистон дар ин кишварҳо маблағи пардохт барои маросими адои ҳаҷ хеле зиёдтар аст.
