Зимни нишасти хабарии имрӯза вазири маориф ва илми Тоҷикистон Нуриддин Саид изҳор намуд, ки 6 литсейи тоҷикӣ-туркӣ ҳамроҳ бо 8 литсейи президентӣ ба низоми ягонаи мактабҳо барои кӯдакони лаёқатманд шомил мегарданд.
«Шахсан ман ва вазорат ҳеҷ гоҳ мухолифи фаъолияти литсейҳои тоҷикӣ-тукӣ дар Тоҷикистон набудем ва ин муассисаҳои таълимии беҳтарин дар бахши маориф ба мактабҳо барои кӯдакони лаёқатманду боистеъдод табдил дода мешаванд», – гуфт ӯ.
Ба қавли вазир, масъалаи ба тавозуни Вазорат супурдани шабакаҳои литсейҳои туркӣ-тоҷикӣ дар Тоҷикистон бо ширкати «Шалола» бо некӣ анҷомида, Вазорат ба тамдиди қарордодҳо бо омӯзгорони фанҳои дақиқ аз Туркия омода аст.
Ёдрас мекунем, ки дар Тоҷикистон 6 литсей-интернати муштараки тоҷикӣ-туркӣ фаъолият доштанд. Муддати 10 соли фаъолияти ин муассисаҳои таълимӣ толибилмони онҳо ба гирифтани 488 медал, аз ҷумла 88 медали тилло дар олимпиадаҳои байнулмилалӣ ноил гардиданд.
«Мо имконоту иқтидори доштаи литсейҳои тоҷикӣ-туркиро нигаҳдорӣ ва афзун карданием ва ба ҳеҷ ваҷҳ ба заифшавии фаъолияти он роҳ намедиҳем, – иброз дошт Нуриддин Саид. – Бо ин мақсад ҳатто даъвати мутахассисон аз кишварҳои хориҷиро дар нақша дорем».
