Толибилмони ягона литсейи русӣ дар шаҳри Душанбе ба дарёфти нахустин медалҳо дар олимпидаи байнулмилалӣ шарафёб гардиданд.
Хонандагони ин муассисаи таълимӣ Юсуфбек Отабеков ва Рустам Абдувоҳидов дар олимпиадаи байнулмилалӣ миёни толибилмони кишварҳои узви ИДМ (5-17 июл, ш. Маскав) аз фанни математика ҷоизаҳо ба даст оварданд. Ин олимпиада бо мусоидати Донишгоҳи миллии таҳқиқотии технологии Маскав («МИСиС») созмон дода шуд.
Дар ҳамин ҳол, ҳанӯз моҳи марти соли равон хонандагони литсейи №1-и пойтахт дар олипиадаи байнулмилалӣ ба номи Ҷолдасбеков аз фанни математика ба гирифтани медалҳо даст ёфта буданд: Рустам Абдувоҳидов ба медали тилло, Юсуфбек Отабеков ва Олмазхон Шаҳринисо ҳар кадоме ба гирифтани медалҳои нуқра мушарраф гардида буданд.
Қобили зикр аст, ки нахустин литсейи русии тамоили таълими физикаву математика дар Душанбе моҳи феврали соли 2010 ба фаъолият шурӯъ намуд ва имсол хонандагони ин муассисаи таълимӣ бори нахуст ҷоизаҳои байнулмилалӣ ба даст оварданд.
