Муддати чанд рӯз аст, ки гармии тоқатфарсо дар Олмон
сокинону сайёҳонро ранҷ медиҳад.
Бино ба иттилои сомонаи расмии шабакаи телевизиони «Ҷаҳоннамо», дар кӯлу наҳрҳои ин кишвар тайи чанд рӯзи ахир 12 нафар ҳангоми оббозӣ ғарқ шуда, номи чанд нафари дигар то кунун дар феҳристи бедаракшудагон аст. Алҳол ҳарорати ҳаво дар ин кишвари аврупоӣ ба 40 дараҷа мерасад.
Гуфта мешавад, аз пайомадҳои гармо сокинони шаҳри Китсингени Бавария бештар азият мекашанд. Чунин гармии ҳаво дар Олмон бори охир соли 1981-ум ба қайд гирифта шуда буд.
Ҳамчунин қайд мешавад, ки аз ҳарорати тоқатфарсо ҳамчунин аҳолии Италия низ ранҷ бурда, гармии ҳаво дар ин ҷо ба беш аз 40 дараҷа расидааст. Бо эътино ба ин ҳолат ҳукуматдорон аз сокинон даъват кардаанд, ки рӯзи худро дар ҷойҳои сояву салқин гузаронанд. Аз таъсири гармии тоқатфарсо чанд нафар дар беморхона бистарӣ гардидааст.
Зимнан зикр мегардад, ки болоравии ҳарорати ҳаворо дар дигар кишварҳои Аврупо, аз ҷумла Франсия, Швейтсария ва Полша низ ба қайд гирифтаанд. Ба иттилои ҳавошиносон, гармии беш аз 40 дараҷаи ҳаво дар ин кишварҳо то охири ҳафта идома хоҳад ёфт.
