Дар мавзеи Қочо-Қарини ноҳияи Ботканди вилояти Ботканд дар қитъаи марзи Тоҷикистону Қирғизистон рӯзи 8 август муноқишаи навбатӣ ба вуқӯъ пайваста, бар асари он як марзбони қирғиз ҷароҳати сабук бардошт.
Маркази матбуоти Хадамоти давлатии марзбонии Қирғизистон дар ин робита иттилоъ медиҳад, ки шоми ҳамин рӯз дар ин мавзеи наздики маҳаллаи аҳолинишини Кок-Тош марзбонони қирғиз убури ғайриқонуиии сарҳад аз ҷониби 15 нафар шаҳрвандони тоҷикро пешгирӣ намуда, 1 нафари онҳоро боздоштаанд ва боқимонда ба қаламрави Тоҷикистон паноҳ бурдаанд.
Гуфта мешавад, ҳангоми ба қароргоҳи дастаи сарҳадбонӣ бурдани боздоштшуда аз қаламрави Тоҷикистон афроди номаълум сӯи онҳо эҳтимолан аз милтиқ оташ кушодаанд, ки дар натиҷа як марзбони қирғиз аз соқи пояш ҷароҳати сабук гирифтааст. Ба марзбони захмишуда кумаки тиббӣ расонида шуда, айни замон ӯ дар бунгоҳи тиббии дастаи сарҳадбонӣ қарор доштааст ва вазъи солимиаш қаноатбахш аст.
Ба иттилои манбаъ, баъди ин ҳодиса таъҷилан вохӯрии намояндагони мақомоти марзбонии Тоҷикистону Қирғизистон доир гардида, дар он намояндаи Қирғизистон тақозо намудааст, ки шахсони гунаҳкор дар ин қазия ба ҷавобгарӣ кашида шуда, нисбати қонуншиканиҳо дар марз чораҷӯӣ шавад.
Намояндаи Тоҷикистон изҳор намудааст, ки дар робита ба ин ҳодиса ҷиҳати ҷустуҷӯву боздошти шахсони ба сӯи марзбонони қирғиз оташкушода тадбирҳо рӯйи кор гирифта шудааст.
Зимнан зикр мегардад, ки айни замон вазъ дар марзи давлатии Тоҷикистону Қирғизистон орому амн аст.
Дар ҳамин ҳол, сухангӯи Сарраёсати Қушӯнҳои сарҳадбонии КДАМ Тоҷикистон Муҳаммад Улуғхоҷаев ба «Азия-Плюс» дар ин робита иттилоъ дод, ки ҷониби Тоҷикистон аз ин ҳодиса огоҳ карда шудааст. «Аз рӯи санҷише, ки дар мавриди ин ҳодиса гузаронида мешавад, қарори дахлдор қабул хоҳад шуд», – гуфт ӯ.
