Коршиносони Созмони Милали Муттаҳид қариб 2,2 баробар афзудани шумори аҳолии Тоҷикистон то соли 2100-ро пешгӯӣ мекунанд.
Дар гузориши нави СММ дар бораи дурнамои афзоиши аҳолӣ дар саросари ҷаҳон (
World population prospects
) дар ин робита зикр мегардад, ки айни замон шумори аҳолии Тоҷикистон 8 млн. 482 ҳазор нафарро ташкил медиҳад, ки қариб 35%-ашон наврасони синни то 14-сола мебошанд.
Гуфта мешавад, соли 1950 шумори аҳолии Тоҷикистон ҳамагӣ ба 1 млн. 532 ҳазор нафар баробар буд. Таҳлилгарони СММ пешгӯӣ мекунанд, ки соли 2030 шумори аҳолии Тоҷикистон то 11,2 млн. нафар, соли 2050 – то 14,2 млн. нафар ва соли 2100 – то 18,5 млн. нафар зиёд мешавад.
Дар ҳамин ҳол, шумори наврасони синни то 14-сола дар соли 20150 то 27% ва то соли 2100 – то 18% коҳиш ёфта, шумори нафарони аз 60-сола боло меафзояд. Агар соли 2015 шумори нафарони синни аз 60-сола боло ҳамагӣ 5% аз шумори умумии аҳолиро ташкил диҳад, пас дар соли 2050 ин нишондиҳанда то 13,2% ва то соли 2100 то 25% зиёд мешавад.
Бино ба маълумоти гузориши мазкур, то соли 2050 шумори аҳолии саросари ҷаҳон беш аз 2 млн. нафар афзуда, то ба 11,2 млрд. нафар мерасад.
