Шӯрои воситаҳои ахбори оммаи Тоҷикистон, Анҷумани миллии воситаҳои ахбори оммаи мустақили Тоҷикистон ва ТҶ «Хома» изҳорот пахш намуда, дар он дархост намуданд, ки аъзои ҳабсшудаи ҲНИТ, ки ба фаъолияти журналистӣ машғул буданд, бо адвокатҳо таъмин карда шаванд.
Дар изҳорот дар робита ба нооромиҳои ахири кишвар нигаронӣ изҳор карда, қайд мешавад, ки ин ҳодисаҳо боиси маҳдудияти ҳуқуқи конститутсиони шаҳрвандон ба дастрасӣ ба иттилоот гардид.
«Мо ба ин боварем, ки ягон масъаларо бо хунрезиву иқдоми эҳсосотӣ ҳал кардан имкон надорад. Ҳама мушкилот бояд дар доираи қонун ва бо риояи манфиатҳои ҳуқуқу озодиҳои инсон мавриди баррасӣ қарор бигирад. Мутаассифона, норасоии маълумоту ахбори дақиқ аз манбаъҳои расмӣ зимни қазияҳои моҳи сентябри соли равон расонаҳои хабарии кишвар ва хориҷиро, ки вазифаашон расонидани маълумоти муътамаду санҷидашуда аст, ба мушкилоти касбӣ дар инъикоси ин ҳодисаҳо рӯ ба рӯ кард. Дастрасии маҳдуд ба ахбор ба зиёд шудани ҳар гуна овозаҳо мусоидат мекунад», – омадааст дар изҳорот.
Гуфта мешавад, дар натиҷа ҳам дар нашрияҳои мустақил ва ҳам матбуоти расмии давлатӣ матлабҳое паҳн гардиданд, ки ҳодисаҳоро аз ҳад эҳсосотӣ ва якҷониба бозтоб мекунанд ва ин ҳолат масъулияти аслии журналистиро зери шубҳа мебарад.
«Илова ба ин, дар пайи боздошти фаъолони ҲНИТ дар робита ба ҳодисаҳои ахир, бархе аз ҳамкасбони мо чанд рӯз боз дар боздоштгоҳ қарор доранд. Бино бар иттилооти пайвандони Ҳикматулло Сайфуллозода- сармуҳаррири нашрияи “Наҷот”-и ҲНИТ, Абдуқаҳҳори Давлат, хатмкардаи факултаи журналистика ва собиқ сармуҳаррири нашрияи ҳизбӣ, Зарафо Раҳмонӣ- масъули нашрияҳои ҳизбии ҲНИТ тайи рӯзҳои боздошт онхо дар бораи ҷурми наздиконашон хабаре надоштанд, онҳоро бо адвокат низ таъмин накардаанд. Ҳол он ки тибқи изҳороти Прокуратураи генералӣ боздоштшудагон ба ҷурми даст доштан дар нооромиҳои охири кишвар гумонбар дониста мешаванд», – қайд мешавад дар изҳорот.
Зикр мегардад, ки ҷомеаи Тоҷикистон то имрӯз дар бораи иттиҳомоти фавқуззикр маълумоти дақиқ надоранд ва то кадом андоза асоси қонунӣ доштани онҳоро намедонанд. «Аз ҳамин хотир, мо аз Ҳукумати Тоҷикистон, масъулини ниҳодҳои ҳифзи ҳуқуқ ва амниятӣ, ки ба баррасии ин қазияҳо машғуланд, дархост дорем, ки тафтишоти пешакиро бо шаффофияти том ва пешниҳоди маълумоти саривақтӣ, эҳтироми ҳуқуқу озодиҳои инсон ба роҳ монанд», – дархост мешавад дар изҳорот.
Ҳамчунин даъват мешавад, ки дар ҷараёни таҳқиқот аз ҳама гуна манфиатҳои шахсию гурӯҳӣ ва пешдовариҳо сарфи назар бояд кард. «Мо мутмаинем, ки ҳимояи ҳуқуқи инсон ва озодии баёну андеша – шарт ва кафолати пешрафти дилхоҳ давлатест, ки худро демокративу ҳуқуқбунёд унвон мекунад», – изҳори боварӣ мешавад дар фарҷом.
