Барои муҳоҷирони кории муқими Русия ва берун аз он замимаи нави мобилии
MIGRANT
бо забонҳои русӣ, тоҷикӣ ва ӯзбекӣ ба кор дароварда шуд. Айни замон ба корбарони замима хизматгузориҳое чун санҷиши манъи вуруд ба қаламрави Русия, ҳақиқӣ будани патент ва иҷозатнома барои кор дастрас аст.
Алҳол замима дар платформаи Android кор карда, ояндаи наздик версияи он барои IPhone роҳандозӣ мешавад (замимаи MIGRANT-ро барои Android метавон
бо ин суроға
насб намуд).
«Кайҳост, ки мо дар андешаи таҳияи замима барои телефонҳои ҳамроҳ (мобилӣ) будем, то ки каме бошад ҳам, ҳаёти муҳоҷирони кориро осонтар кунем. Зеро на ҳама компютер доранд ва на ҳама касон ба дарёфту истифодаи захираҳои иттилоотии мақомоти давлатӣ, аз ҷумла Хадамоти федералии муҳоҷират (ХФМ) қодиранд. Дар замимаи мо бошад, шакли хеле соддаву қулай барои дархост таҳия шудааст, ки тариқи он истифодабаранда маълумоти барояш заруриро дарёфт мекунад. Ба ӯ ҷустуҷӯи посух зарур нест, масалан ба савол дар бораи манъи вуруди ӯ, дар сомонаи ХФМ – замима ба таври автоматӣ дархостро ба заминаи интернетии мақомоти давлатӣ ирсол мекунад ва ба корбар посухи гирифтаро пешниҳод мекунад. Яъне дар як замима ҳамаи хизматгузориҳои электронии давлатӣ гирдоварӣ мешаванд, ки муҳоҷир онро аз сомонаҳои гуногуни сохторҳои давлатӣ ба даст оварда метавонад ва ба шаҳрвандон дигар ҷустуҷӯҳо дар ин сомонаҳо зарур намешавад», – шарҳ додаанд ба «Фергана» дар LexMobile – ширкати таҳиягари замимаи мобилӣ.
Ба гуфтаи намояндагони LexMobile, бо назардошти эҳтиёҷуталабот ва пешниҳодоти корбарон, иловаи бисёре дигар аз корҳои (функсмяҳои) мароқангез ва муфид дар замима низ дар назар аст.
«Бидуни воридшавӣ ба сомонаи Хадамоти федералии андоз, тавассути замима квитансия барои пардохти маблағи патентро таҳия намуда, онро метавон пардохт кард, метавон аз рақами мушаххаси андозсупорандаи худ огаҳӣ ёфт ва аз дигар хизматгузориҳо низ истифода кард. Мо онро «оқил» карданием, яъне ба он вазифаи «ба хотир расонидан»-ро насб карданием, ки дар он вақти пардохти маблағи патент, муҳлати анҷоми бақайдгирӣ ва аз кишвар хориҷ шудан хотиррасон мешавад, то ки муҳоҷирон саривақт ин амалҳои заруриро ба анҷом расонанд. Дар ин ҳолат қонуншиканиҳои беихтиёр аз ҷониби онҳо камтар мешавад», – гуфтааст ҳамсуҳбати хабаргузорӣ.
Қобили зикр аст, ки ин аллакай замимаи мобилии дуюмест, ки махсус барои муҳоҷирони кории муқими Русия таҳия шудааст. Моҳи августи соли равон лоиҳаи интернетии «ТутЖдут» (ИнҷоИнтизоранд) барои телефонҳои мобилӣ нахустин ба ин монанд замимаро роҳандозӣ кард, ки ба муҳоҷирон дар дарёфти кору пайдо намудани шиносҳои нав дар макони наздики иқоматашон, дигар хизматгузориҳои зарурӣ ва машваратҳои амаливу посухҳо ба саволҳояшон оид ба мушкилот кумак мекунад (алҳол дар шаҳру вилояти Маскав).
