Корбарони фаъоли сегменти тоҷикии шабакаи иҷтимоии Фейсбук роҳу воситаҳои кумак ба осебдидагон аз
заминларзаи харобиовари рӯзи 7 декабр
дар Вилояти Мухтори Кӯҳистони Бадахшонро пешниҳод намуданд.
Дар гурӯҳи Pamir news дар ин робита иттилоъ дода мешавад, ки муштариёни ширкатҳои Tcell ва Beeline, ки хоҳиши кумак кардан ба осебдидагон аз заминларза дар водии Бартангро доранд, тариқи рақами 5005 ба Tcell ва рақами 5555 ба Beeline смс -паёмак ирсол карда метавонанд.
Арзиши як SMS-паёмак 5 сомонӣ аст. Масалан, агар Шумо 50 сомонӣ маблағ кумак карданӣ бошед, пас 10 адад SMS ирсол менамоед.
Ҳамчунин барои ҷамъоварии кумаки башардӯстона ба осебидагон аз ин офат нуқтаҳои қабул ташкил шудааст, ки кӯрпаву кампал, сарулибоси гарм ва дигар асбобу лавозимоти зарурии дигари рӯзгорро метавон ба ин нуқтаҳо супурд.
Гуфта мешавад, кумакро метавон ба дафтарҳои кории ширкати Beeline бо суроғаҳои зерин овард:
– кӯчаи Н.Махсум 72/9 (назди Маркази савдои «Саодат»);
– кӯчаи Н.Қарабоев 110 (рӯбарӯи бозори «Саховат», Дом Гарант);
– хиёбони Рӯдакӣ 95 (рӯбарӯи чойхонаи «Роҳат»).
Зимнан зикр мегардад, ки барои осебдидагон аз заминларза дар водии Бартанг ҳамчунин дар шуъбаи «Амонатбонк» дар Рӯшон таҳти рақами
20202972600050571000 БИК 350101626 Корсчет 20402972316264 ИНН 720002556
суратҳисоби бонкӣ кушода шудааст.
Дар ҳамин ҳол, имрӯз дар толори Вазорати корҳои дохилӣ бо иштироки вазири корҳои дохилӣ генерал-лейтенанти милитсия Раҳимзода Рамазон Ҳамро, сардорони раёсатҳо ва ҷузъу томҳои мақомоти корҳои дохилӣ ҷаласа баргузор гардида, дар он масъалаҳои кӯмак расонидан ба зарардидагони офати табиӣ дар ВСКБ ва бартараф намудани оқибатҳои он мавриди баррасӣ қарор гирифтанд.
Ҳайати шахсии мақомоти корҳои дохилӣ аз кушодани суратҳисоби махсус ба зарардидагони заминларзаи рӯзи 7-уми декабр ҷонибдорӣ намуда, тасмим гирифтанд, ки ба суратҳисоб маблағҳои муайян гузаронанд.
Мавриди зикр аст, ки кормандони милитсия аз лаҳзаҳои аввали рух додани ҳодисаи табиӣ бо мардуми мавзеъҳои зарардида дар робитаи зич қарор дошта, дар бартараф намудани оқибатҳои заминларза онҳоро кӯмаку дастгирӣ менамоянд.
Қаблан иттилоъ дода будем, ки ягона
роҳи мошингард миёни маркази ноҳияи Рӯшон ва водии Бартанги ВМКБ
, ки аз заминларза аз ҳама бештар зарар дид, бар асари фаромадани сангу кӯҳпораҳои зиёд баста боқӣ мемонад.
Ғайр аз ин, чархболҳои Вазорати мудофиаи
бо дастури президент барои кумак сафарбаршуда
низ ба далели номусоидии обуҳаво аз маркази ноҳияи Рӯшон ба водии Бартанг парвоз карда наметавонанд.
Ёдрас мекунем, ки
дар маҷлиси ҳукумати ҷумҳурӣ
зикр гардид, ки дар қаламрави вилояти Бадахшон бар асари заминлраза 237 хона пурра ва 588 хона қисман вайрон шудаанд. 214 хонаи пурра ва 205 хонаи қисман зарардида ба ноҳияи Рӯшон рост меояд. Ҳамчунин иншооти зиёди иҷтимоӣ, аз ҷумла мактабу китобхона ва дигар муассисаҳо қисман зарар дидаанд. Бошандагони ҳамаи 237 хонаи пурра харобшуда дар ҷойҳои зисти муваққатӣ ҷойгир ва бо маводи ғизоӣ, сарулибос ва дигар ашёи зарурӣ таъмин карда шудаанд.
