Бо мусоидати намояндагии Вазорати меҳнат, муҳоҷират ва шуғли аҳолии Тоҷикистон оид ба муҳоҷират дар Русия суди шаҳри Маскав қарори суди ноҳияи Измайловои ин шаҳр дар бораи ихроҷи маъмурии 2 шаҳрванди Тоҷикистон аз қаламрави Русияро бекор кард.
Тавре котиби матбуотии намояндагии мақомоти муҳоҷирати Тоҷикистон дар Русия Иброҳим Аҳмадов дар ин робита иттилоъ дод, зодагони деҳаи Каҷровути ноҳияи Ғончӣ Пӯлодҷон Собирови 46-сола ва Раҳматуллои Иззатуллои 18-сола ба намояндагӣ муроҷиат намуда изҳор доштаанд, ки зимни санҷиши ҳуҷҷатҳо мақомоти ҳифзи ҳуқуқ ба онҳо имкон надодаанд, ки ҳуҷҷатҳои иҷозатномавӣ барои будубош, аз ҷумла патент барои корро пешниҳод намоянд, зеро ҳамон рӯз онҳо фаромӯш кардаанд, ки патентро ҳамроҳи худ ба ҷойи кор биоваранд.
Бо назардошти ҳамаи ҳолатҳо, намояндагӣ ба онҳо ҷиҳати тартиб додани шикоят аз болои қарори суд кумак карда, рӯзи 8 декабр суди Маскав қарори суди ноҳияи Измайлово дар бораи ихоҷи маъмурии шаҳрвандони номбурда ва ҷаримабандӣ дар ҳаҷми 5 ҳазор рубли русиро бекор намудааст.
