Кормандони шуъбаҳои консулгарии Иёлоти Муттаҳидаи Амрико саҳифаҳои афроди довталаб ба гирифтани раводиди вуруд ба ин кишварро дар шабакаҳои иҷтимоии Интернет мавриди омӯзиш қарор медиҳанд.
Намояндаи департаменти давлатии ИМА Ҷон Кирби ба хабаргузории РБК дар ин робита изҳор доштааст, ки чунин санҷиш куллӣ набуда, интихобӣ сурат мегирад. «Ин куллан ҳама ҳолатҳоро дар бар намегирад. Ҳар як ҳолат инифродӣ баррасӣ мешавад», – гуфтааст номбурда.
Ӯ ҳамчунин иттилоъ додаст, ки пас аз ҳодисаи тирпарронӣ дар шаҳри Сан-Бернардино (иёлати Калифорния), департаменти давлатӣ сиёсатихудро нисбати азназаргузаронии саҳифаҳо дар шабакаҳои иҷтимоӣ бозбинӣ кардааст.
Таври маълум дар ин ҳодиса Ризвон Фаррух ва ҳамсари ӯ Ташфин Малик 14 нафарро кушта, 21 нафари дигарро захмӣ карданд. Малик соли 2014 таври қонунӣ ба ИМА омада, дар ҳамин ҳол дар шабакаҳои иҷтимоӣ ба садоқат ба гурӯҳи Давлати исломӣ савганд ёд карда будааст.
Пас аз ин фоҷеа президенти ИМА Барак Обама аз департаменти амнияти миллӣ ва департаменти давлатӣ дархост намуд, ки барномаи «раводиди ҳамсарон» бозбинӣ шавад. Оилаи Ризвон Фаррух ва Ташфин Малик маҳз аз ҳамин барнома истифода карда буданд.
Ба ҷуз ин тадбир, санаи 9 декабр палатаи намоянагони конгресси ИМА бо аксари кулли овозҳо лоиҳаи қонун дар бораи шадидтар шудани вуруд ба ИМА-ро пазируфт. Дар сурати қабул шудани он, назорат аз болои вуруди шаҳрвандони 38 кишвар, ки ба боздид аз ИМА бидуни гирифтани раводид ҳуқуқ доранд, пурзӯр карда мешавад.
