Ҳукумати Тоҷикистон қарор «Дар бораи Маркази ягонаи коммуникатсионии алоқаи барқӣ»-ро ба тасвиб расонид.
Дар матни қарор, ки дар нашрияи ҳукумат
«Ҷумҳурият»
интишор шудааст, гуфта мешавад, маркази мазкур «бо мақсади таъмини назорат ва танзими трафикҳои воридотию содиротии хизматрасониҳои байналмилалии алоқаи барқӣ ва интернет ташкил карда мешавад».
«Гузариши трафикҳои воридотию содиротии хизматрасониҳои байналмилалии алоқаи барқӣ ва интернет тавассути Маркази ягонаи коммуникатсионии алоқаи барқии оператори давлатии Ҷамъияти саҳомии кушодаи «Тоҷиктелеком»-и Хадамоти алоқаи назди Ҳукумати Ҷумҳурии Тоҷикистон ба роҳ монда шавад», – омадааст дар қарор.
Ҳамчунин таъмини иҷрои қарори мазкур марҳида ба марҳила дар соли 2016 ба дӯши Хадамоти алоқаи назди ҳукумати Тоҷикистон вогузор карда мешавад.
Зимнан зикр мегардад, ки иҷрои қарори мазкур барои ҳамаи субъектҳои хоҷагидории дар соҳаи алоқаи барқӣ фаъолияткунандаи Тоҷикистон ҳатмӣ мебошад.
