Ҷаласаи Шӯрои роҳбарони агентиҳои давлатии иттилоотии кишварҳои узви Иттиҳоди Давлатҳои Мустақил рӯзҳои 15-16 марти соли ҷорӣ дар шаҳри Душанбе доир мегардад.
Бино ба иттилои Кумитаи иҷроияи ИДМ, дар ҷаласа аз фаъолияти агентиҳои иттилоотии ИДМ дар соли 2015 натиҷагирӣ шуда, нақшаҳои ҳамкорӣ дар соли равон мавриди баррасӣ қарор мегиранд.
Гуфта мешавад, зимни ҳамоиш баррасии масоили ҳамкориҳои хадамоти аксбардории агентиҳо ва омодагӣ ба ҷашни 25-умин солгарди Иттиҳод ( моҳи декабр) дар назар буда, атрофи ҷараёни амалисозии лоиҳаҳои муштарак табодули назар сурат мегирад.
Зимнан зикр мегардад, ки дар кори ҷаласа раиси Шӯрои иттилоотии ИДМ, директори генералии ТАСС, роҳбарони агентиҳои давлатии итттилоотии Озарбойҷон, Арманистон, Беларус, Қазоқистон, Қирғизистон, Молдова, Тоҷикистон, Русия ва намояндагони Кумитаи иҷроияи ИДМ иштирок мекунанд.
Шӯрои роҳбарони агентиҳои давлатии иттилоотии кишварҳои узви Иттиҳоди Давлатҳои Мустақил 3 ноябри соли 1995 тибқи Созишномаи кишварҳои узви ИДМ таъсис дода шуда, инъикоси равандҳои ҳамгиройӣ дар Иттиҳод барои аҳолии кишварҳо аз вазифаҳои муҳими он ба шумор меравад. Дар доираи фаъолият ба масъалаҳои азхудкунии медиатехнологияҳои нав ва ҳамкорӣ дар шароити ба таври густурда ҷоришавии он таваҷҷуҳи хосса зоҳир мегардад.
