Муовини якуми вазири корҳои хориҷии Ҷумҳурии Тоҷикистон Низомиддин Зоҳидӣ 19 апрели соли 2016 ҳайати Ҷумҳурии Исломии Афғонистон бо роҳбарии муовини вазири умури хориҷаи ин кишвар доктор Насираҳмад Андеша, ки бо сафари корӣ дар Душанбе қарор дорад, ба ҳузур пазируфт.
Бино ба иттилои Вазорати корҳои хориҷии ҶТ, дар ҷараёни суҳбат, ки дар фазои дӯстона ва ҳамдигарфаҳмии комил сурат гирифт, ҷонибҳо ҳолат ва дурнамои ҳамкориҳои Тоҷикистон ва Афғонистонро дар заминаҳои сиёсӣ, иқтисодӣ, энергетикӣ ва иҷтимоӣ баррасӣ намуданд.
Гуфта мешавад, дар ин замина ба раванди омодагиҳо ба баргузории маросими расмии оғози сохтмони тарҳи КАСА -1000, ки татбиқи он дар рушди ҳамкориҳои гуногунҷанба ва таъмини амнияту суботи минтақа аҳамияти бузурги таърихӣ дорад, таваҷҷуҳи вежа зоҳир гардид.
Зимнан зикр мегардад, ки атрофи тарҳҳои дигари минтақавӣ ва масъалаҳои тақвияти ҳамкориҳо дар соҳаҳои амният, ҳифзи сарҳадот ва муборизаи муштарак алайҳи терроризми байналмилалӣ ва қочоқи маводди мухаддир табодули назар сурат гирифт.
