Иттиҳоди Аврупо (ИА) барои дастгирии буҷети Тоҷикистон маблағи навбатиро ҷудо карданист.
Рӯзи 3 май зимни мулоқоти вазири молияи Тоҷикистон Абдуҷаббори Қурбониён бо ҳайати Иттиҳоди Аврупо дар Душанбе ҷараёни иҷрои шартҳо ҷиҳати пешниҳоди воситаҳои грантӣ баррасӣ шуданд.
Бино ба иттилои котиботи Вазорати молияи ҶТ, ҷонибҳо ҷараёни ислоҳот дар бахшҳои тандурустиву ҳифзи иҷтимоӣ ва идоракунии молияи давлатиро баррасӣ намуда, «ҳамкориҳои мутақобилан судманд ва пурсамари Тоҷикистон бо Иттиҳоди Аврупо»-ро таъкид доштанд.
Қобили зикр аст, ки дар доираи Барномаи дастгирии рушди инсонӣ Иттиҳоди Аврупо барои дастгирии буҷети Тоҷикистон воситаҳои бурсӣ ҷудо мекунад. Ин воситаҳоро ҷумҳурӣ дар сурати баргузор намудани тадбирҳои муваффақ оид ба беҳбудӣ дар соҳаи идоракунии молияи давлатӣ ва роҳандозии чанде чораҳо доир ба амалисозии ислоҳот дар бахши тандурустӣ ва ҳифзи иҷтимоӣ дастрас карда метавонад.
Қаблан дар чаҳорчӯби ин барнома Иттиҳоди Аврупо ба Тоҷикистон 6,2 млн. евро ҷудо кард. Шурӯъ аз соли 1992 ҳаҷми умумии кӯмаки Иттиҳоди Аврупо ба Тоҷикистон 750 млн. евро арзёбӣ мешавад.
Давоми 8 соли охир кумаки Иттиҳоди Аврупо ба Тоҷикистон дар шакли дастгирии буҷетӣ ва кумаки техникӣ пешниҳод мегардад.
