Дар пойтахти Ҷумҳурии Беларус – шаҳри Минск анҷумани IX саратоншиносон ва радиологҳои кишварҳои узви Иттиҳоди Давлатҳои Мустақил ва минтақаи АвруОсиё ҷараён дорад, ки то 17 июн идома меёбад.
Дар чорабиниҳои анҷуман мутахассисон ва коршиносони муваффақ ширкат варзида, масоили муҳими табобат ва ташхиси бемориҳои саратон ва тарзу усулҳои роҳандозии фаъолияти хадамоти саратоншиносиро баррасӣ ва атрофи дастовардҳои саратоншиносии бунёдӣ табодули назар мекунанд.
Дар анҷумани мазкур Тоҷикистонро 10 нафар саратоншиносон намояндагӣ карда, ба иштирокдорони чорабинӣ 6 маърӯзаи илмӣ пешниҳод мекунанд. Дар ҷаласаи ташкили мубориза зидди саратон директори Маркази ҷумҳуриявии саратоншиносӣ Зафар Ҳусейнов маърӯза карда, ба ҳозирин доир ба мушкилоту дурнамо ва дастовардҳои соҳаи саратоншинсоии Тоҷикистон маълумот дод.
Тибқи пешгӯии коршиносон, давоми солҳои 2015-2025 шумори ҳолатҳои гирифторӣ ба навъҳои гуногуни бемории саратон дар кишварҳои гуногун аз 16 то 30% меафзояд. Мушкилоти ин соҳаро коршиносон маблағгузории нокофӣ барои муолиҷаи бемориҳои саратон ва ҳамчунин дар сатҳи зарурӣ таъмин набудан бо таҷҳизоти ташхис унвон карданд.
Дар доираи чорабиниҳои анҷуман ҳамчунин бо иштироки ширкатҳои муваффақи дорусозӣ ва корхонаҳои истеҳсоли таҷҳизоти тиббӣ намоишгоҳ баргузор мешавад.
Қобили зикр аст, ки ҳамасола дар Тоҷикистон ҳудуди 6,5 ҳазор нафар гирифторони бемории саратон ошкор карда мешаванд.
