Раҳбарияти Қушӯнҳои сарҳадии Тоҷикистон маълумоти интишоршуда аз ҷониби чанде аз васоити ахбори умум доир ба пурзӯр кардани посбонии марз бо Ӯзбекистонро рад мекунад.
Сардори маркази матбуоти Қушӯнҳои сарҳадии КДАМ ҶТ Муҳаммад Улуғхоҷаев ба «Азия-Плюс» дар ин робита иттилоъ дод, ки дар сарҳади давлатӣ бо Ӯзбекистон марзбонони тоҷик бо реҷаи муқаррарӣ фаъолият доранд.
«Мувофиқи маълумотҳое, ки мо дар даст дорем, сарҳадбонони кишвари ҳамсоя низ ҳеҷ гуна тадбирҳои пурзӯр кардани назорати сарҳадро пеш нагирифтаанд ва ба таври маъмулӣ фаъолият доранд», – иброз дошт ӯ.
Қобили зикр аст, ки қаблан нашрияи «Москивский комсомолец» бо истинод ба сарчашмаҳои наздик ба раҳбарияти Тоҷикистон иттилоъ дода буд, ки пас аз маълумот дар бораи марги Ислом Каримов, Тоҷикистон аз ташаннуҷи вазъ дар марз бо Ӯзбекистон нигаронӣ дорад ва дар ин робита дар марзи ин ду кишвар ба тадбирҳои амниятӣ тақвият бахшидааст.
