Шаҳрвандони Ҷумҳурии Либерия, ки дар Африқои Ғарбӣ ҷойгир аст, ба боварии сокини 33-солаи шаҳри Душанбе даромада, аз ӯ дар ҳаҷми 100 ҳазор доллари ИМА ва 10 ҳазор евро маблағи пулӣ гирифтаанд.
Бино ба маълумоти дафтари матбуоти ВКД Тоҷикистон, ду нафар шаҳрвандони Ҷумҳурии Либерия, мардони 49 ва 52-сола, муваққатан истиқоматкунандагони шаҳри Душанбе, худро тоҷирони калони ширкати хориҷӣ муаррифӣ намуда, бо роҳи фиреб аз ӯ маблағро гирифта, сипас ғайб мезананд.
Гуфта мешавад, ба гумони даст доштан дар ин ҷинояти қаллобӣ кормандони милитсия ин ду нафар шаҳрвандони Ҷумҳурии Либерияро дастгир кардаанд.
Зимнан зикр мегардад, ки аз рӯи ин ҳодиса парвандаи ҷиноятӣ оғоз гардида, тафтишот дар ин самт идома дорад.
