Зимни суханронӣ дар конфронси байнулмилалии «Расонаҳо (медиа) дар муҳити рақамӣ: чолиш ва имконот», ки дар Душанбе ҷараён дорад, коршиноси масоили расонаҳои хабарӣ аз Қазоқистон Валерий Маштаков изҳор дошт, ки бозори телерекламаи Тоҷикистон дар қиёс бо дигар кишварҳои минтақа хеле кам аст: бо аҳолии 8,5 млн. нафар соли 2015 ин бозор дар Тоҷикистон ҳамагӣ 3,9 млн. доллари ИМА-ро ташкил додааст ва ин ҳам дар ҳолест, ки дар Қирғизистон бо аҳолии 6,1 млн. нафар ин нишондиҳанда дар соли гузашта ба 7 млн. долллари ИМА баробар шудааст.
Дар таҳқиқоти бозорҳои телерекламаи аз ҷониби Маштаков пешниҳодшуда дар бораи 8 кишвари собиқ шӯравӣ маълумот дода шудааст: Тоҷикистон, Қазоқистон, Беларус, Гурҷистон, Озарбойҷон, Арманистон, Қирғизистон ва Молдова.
Нишондиҳандаи пасттарин дар Тоҷикистон (3,9 млн. $) сабт гардида, пешсафи ин рейтинг Гурҷистон аст: бо аҳолии 3,9 млн. нафар соли 2015 бозори телерекламаи ин кишвар 36 млн., Қазоқистон – 101 млн., Беларус – 41 млн., Озарбойҷон – 30 млн., Арманистон – 20 млн. ва Молдова – 17 млн. доллари ИМА-ро ташкил додааст.
Ғайр аз ин, коршиноси қазоқ таваҷҷуҳи ҳозиринро ба масъалаи дар саросари ҷаҳон босуръат кам шудани тамошои маъмулии телевизион ҷалб намуда, қайд кард, ки дар ин робита мутаносибан бозорҳои телереклама низ коҳиш меёбанд.
Зимнан зикр гардид, ки шумори хонандагони матбуоти чопӣ низ босуръат рӯ ба коҳиш овардааст. «Мутолиаи рӯзномаҳо (газетаҳо) 25% ва мутолиаи маҷаллаҳо – 18% коҳиш ёфтааст», – иброз дошт коршинос.
Қобили зикр аст, ки қаблан дар ин конфронс мушовири дастгоҳи ёвари президенти ҶТ дар масоили рушди иҷтимоӣ ва робита бо ҷомеа Шуҳрат Бӯриев низ доир ба нақши ВАО дар таъмини амнияти кишвар изҳори назар карда буд.
