Бино ба маълумоти гузориши нави Пажӯҳишгоҳи иқтисод ва сулҳи Лондон, миёни кишварҳои Осиёи Марказӣ Тоҷикистон бештар ба хатари терроризм осебпазир аст.
Дар Индекси глобалии терроризм (The Global Terrorism Index) байни 163 кишвари ҷаҳон Тоҷикистон дар зинаи 56-ум қарор дорад. Соли гузашта дар Тоҷикистон 3 амали террористӣ рух дода, бар асари он 12 нафар ҳалок ва 10 тан осеб диданд. Доир ба ҳаҷми зиёни моддӣ аз ин ҳодисаҳо маълумот дода намешавад.
ИЗОБРАЖЕНИЕ Скриншот аз Гузориш visionofhumanity.org
Кишвари бештар амнтари минтақаи Осиёи Марказӣ Туркманистон эътироф шудааст, ки дар мақоми 130-юми рейтинг ҷойгир шудааст. Ӯзбекистон зинаи – 117-ум, Қазоқистон – 94-ум, Қирғизистон – 84-ум ва Русия – мақоми 30-юмро ишғол кардаанд.
Дар гузориш қайд мешавад, ки соли 2016 шумори қурбониён аз амалҳои террористӣ дар ҷаҳон 10% – то 29,4 ҳазор нафар кам шуда, дар ҳамин ҳол, шумори қурбониёни амалҳои террористӣ дар кишварҳои рушдёфта 650% – то 731 нафар афзудааст.
Гуфта мешавад, аз ҳама бештар аз терроризм 5 кишвар – Ироқ (6969 нафар ҳалокшудагон дар амалҳои террористӣ), Афғонистон (5312 нафар), Нигерия (4940 нафар), Покистон (1086 нафар) ва Сурия (2761 нафар) ранҷу азият мекашанд, ки ба онҳо 72%-и ҳамаи қурбониёни амалҳои террористӣ рост меояд.
Таҳқиқот 163 кишварро фаро гирифтааст, ки 99,7%-и аҳолии ҷаҳонро ташкил медиҳад. Зимни муайян кардани ҷойҳо дар рейтинг якчанд омил, аз ҷумла шумори ҳалокшудагону осебдидагон дар амалҳои террористӣ, таъсири онҳо ба иқтисод ва ғайра ба инобат гирифта мешавад.
