Тарҳи “Зистан мехоҳам” (Хочу жить)-и Украина дар гузорише гуфтааст, ки 3 ҳазору 407 зодаи Тоҷикистон дар Артиши Русия алайҳи ин кишвар меҷанганд. Ин омор рӯзи 20-уми апрел нашр шудааст.
Дар гузориши нави худ ин тарҳи украинӣ гуфтааст, маълумоти шахсии 12 ҳазору 666 зодаи Осиёи Марказиро муайян кардааст, ки “бо Вазорати дифои Русия шартнома бастаанд ва дар сафи артиши Русия ҷангидаанд ё меҷанганд”:
Ӯзбекистон – 4 ҳазору 853 нафар;
Қазоқистон – 2 ҳазору 389 нафар;
Қирғизистон – 1 ҳазору 439 нафар;
Туркманистон – 578 нафар.
Ҳеҷ як мақомоти ин кишварҳо то ҳол ба нашри рӯйхати тарҳи “Зистан мехоҳам” вокуниши расмӣ накардаанд.
Бар асоси додаҳои соли 2025, ки аз сӯйи “Зистан мехоҳам” нашр шуда буд, номи 5 ҳазору 740 зодаи Осиёи Марказӣ дар рӯйхати ширкаткунундагони ҷанг дида мешуд.
Қаблан дар моҳи октябри соли гузушта лоиҳаи мазкур номи 446 зодаи Тоҷикистонро интишор карда, гуфта буд, онҳо дар сафи артиши Русия дар ҷанг алайҳи Украина кушта шудаанд. Пеш аз ин, “Зистан мехоҳам” номи 628 зодаи Тоҷикистонро расонаӣ кард, ки ба гуфтаи ин лоиҳа, танҳо дар 6 моҳи аввали соли 2025 бо Вазорати дифои Русия шартнома бастаанд. Дар моҳи апрели соли гузашта бошад, тарҳи мазкур аз 931 зодаи Тоҷикистон, ки дар Украина аз ҷониби Русия меҷанганд, ном бурда буд.
Тоҷикистон то ҳол ба ҳеҷ як гузориши “Зистан мехоҳам” вокуниши расмӣ накардааст.
Танҳо қаблан, мақомоти қудратӣ, аз ҷумла, Ҳабибулло Воҳидзода, додситони кулли Тоҷикистон зимни нишасти матбуотӣ гуфта буд, ки ягон шаҳрванди кишвар “барои иштирок дар муҳорибаҳои Украина”, ба ҷавобгарии ҷиноятӣ кашида нашудааст.
Коршиносон мегӯянд, Русия дар симои муҳоҷирон аскари тайёрро мебинад ва ҳарчи бештар онҳоро дар ҷанг қурбон кардан мехоҳад.
Русия ҳеҷ гоҳ пинҳон накардааст, ки шаҳрвандони кишварҳои дигар, аз ҷумла Тоҷикистонро барои имзои шартнома бо артишаш ва минбаъд ҷанг дар Украина ҷалб мекунад.
Мувофиқи иттилои Кумитаи тафтишотии Русия ба ҳолати июни соли 2024, зиёда аз 10 ҳазор муҳоҷири меҳнатӣ, ки шаҳрвандии Русияро гирифтаанд, барои иштирок дар амалиётҳои ҷангӣ дар Украина фиристода шудаанд.
Барои ҷалби шаҳрвандони кишварҳои дигар ба ҷанг бо дастури раиси ҷумҳури ин кишвар тарзи соддакардашудаи гирифтани шаҳрвандӣ низ пешниҳод гардидааст. Аммо ин кишвар аз ҳолатҳои зиёди фиреб, таҳдид, фишор ва сӯйистифода аз вазъи танги муҳоҷирон барои имзои иҷбории шартнома бо артишаш сухан намегӯяд.
Аз ҷумла, аз зиндониён, ки зодаи кишварҳои Осиёи Марказӣ ҳастанд ва ба ҷанги Украина иҷборӣ ҷалб мешаванд, мақомоти Русия ҳарфе намезанад, ҳарчанд расонаҳо борҳо шикояти зиндониёнро нашр карданд.
Ҳеҷ як мақомоти ин кишварҳо то ҳол ба нашри рӯйхати тарҳи “Зистан мехоҳам” вокуниши расмӣ накардаанд.Дар Telegram, Facebook ва Instagram бо мо бимонед.
