Обуҳавошиносон аз фарорасии обуҳавои номусоид рӯзҳои истироҳати ҳамин ҳафта ҳушдор медиҳанд.
«То 19 феврал дар қаламрави ҷумҳурӣ обуҳавои ноустувор боқӣ монда, боришоти зиёд, селфароиҳо ва болоравии сатҳи об дар дарёҳо дар назар аст», – хабар медиҳад Агентии гидрометеорологияи Тоҷикистон.
Гуфта мешавад, рӯзи 17 феврал дар баъзе ноҳияҳои вилояти Суғд, минтақаи ғарби ВМКБ ва ноҳияҳои кӯҳистони тобеи марказ барфи зиёд борида, рӯзҳои шанбе ва якшанбе дар минтақаи марказии ноҳияҳои тобеи марказ ва вилояти Хатлон, ҳамчунин дар ғарби ВМКБ барф меборад.
«Рӯзи 18 феврал дар робита ба боришоти зиёд, дар ноҳияҳои доманакӯҳи вилояти Хатлон, дар ноҳияҳои Файзобод, Ваҳдат ва Рӯдакӣ селфароиҳо дар назар буда, дар ҳавзаи дарёҳои Яхсу, Қизилсу (ҷанубӣ) ва рӯдхонаҳои аз нишебиҳои қаторкӯҳи Ҳисор ҷоришаванда сатҳи об боло меравад», – қайд мешавад дар маълумоти обуҳавошиносон.
Қобили зикр аст, ки бар асари барфрезиҳои ахир Тоҷикистон ба мушкилоти зиёд дучор шуда, одамон зери тарма ҳалок, роҳҳо баста ва ба хоҷагиҳои хусусӣ зиёни зиёд расид.
