Хадамоти гумруки Тоҷикистон шаҳрванди Русия Татяна Хужинаи 41-соларо барои кӯшиши аз қаламрави Тоҷикистон баровардани тангаи дутинаи мисини истеҳсоли соли 1823 боздошт кард.
Тавре дар сомонаи Хадамоти гумрук иттилоъ дода мешавад, боздоштшуда, мусофири хатсайри Душане – Маскав кӯшиш кардааст, ки тангаро бидуни зикр дар эъломияи бағочи худ ба хориҷи кишвар интиқол диҳад.
Мувофиқи хулосаи ташхиси Вазорати фарҳанги Тоҷикистон, тангаи мусодирашудаи замони подшоҳӣ дар ҳолати хуб қарор дошта, дорои арзиши таърихию фарҳангӣ, нумизматикӣ (сиккашиносӣ) ва осорхонавӣ мебошад.
Таъкид мешавад, ки мутобиқи қонунгузории Тоҷикистон интиқоли ғайрирасмии он аз ҳудуди Ҷумҳурии Тоҷикистон ва дигар кишварҳои хориҷ мамнӯъ аст.
Зимнан зикр мегардад, ки аз рӯи ҳолати зерин нисбат ба шаҳрванди мазкур бо моддаҳои 32 қисми 2 ва 289 қисми 3-и Кодекси ҷиноятии Ҷумҳурии Тоҷикистон парвандаи ҷиноятӣ оғоз гардидааст.
