Бо қарори ҳукумати ҶТ Нуъмон Абдуғаффорзода раиси Кумитаи рушди сайёҳии назди Ҳукумати Ҷумҳурии Тоҷикистон таъин шуд. Роҳбари нави Кумита қаблан дар Кумитаи амволи давлатии ҷумҳурӣ кор мекард.
Бино ба иттилои хадамоти матбуоти сарвари давлат, Ҳабибулло Амрбекзода, ки қаблан ба ҳайси муовини раиси Кумитаи ҷавонон, варзиш ва сайёҳии кишвар фаъолият дошт, муовини ӯ таъин шуд.
Собиқ корманди Вазорати рушди иқтисод ва савдои ҷумҳурӣ Ширин Амонзода муовини дигари раиси Кумитаи рушди сайёҳӣ таъин шуд.
Мувофиқи фармонҳои сарвари давлат, Қурбониён Тоҷиддин бинобар риоя накардани қонун ҳангоми баррасии парвандаҳо ва содир намудани кирдоре, ки шаъну эътибори судяро паст мезанад, аз вазифаи судяи суди ноҳияи Панҷи вилояти Хатлон озод карда шуда, ваколати судяи суди шаҳри Вахдат Қурбонзода Қудратулло бинобар вафоташ қатъ карда шуд.
Ҳамчунин мувофиқи амри Президент, Маҳкамзода Махсудҷон аз вазифаи мудири Котиботи Сарвазири Ҷумҳурии Тоҷикистон озод карда шуд.
