Дар меҳмонхонаи «Шератон»-и шаҳри Душанбе маросими ифтитоҳи ҳамоиши доираҳои соҳибкории Тоҷикистон ва музофоти Хайнани Ҷумҳурии Мардумии Чин баргузор гардид.
Бино ба иттилои АМИТ «Ховар», дар ҳамоиш раиси Палатаи савдо ва саноати Тоҷикистон Шариф Саид, намояндагони вазорату идораҳои ҷумҳурӣ ва беш аз сад нафар соҳибкорони Тоҷикистон, инчунин роҳбарону намояндагони 25 ширкати бонуфузи музофоти Хайнан, ки дар соҳаҳои саноат, кишоварзӣ ва туризм фаъолият доранд, иштирок карданд.
Зимни суханронӣ дар маросими ифтоҳи ҳамоиш Шариф Саид гуфт, ки то соли 2020 Тоҷикистону Чин ният доранд, ки ҳаҷми муомилоти молро то 3 млрд. доллар расонанд ва дар ин самт ҳам дар сатҳи ҳамкориҳои дуҷониба ва ҳам бисёрҷониба кӯшиши зиёд ба харҷ дода мешавад.
Зикр шуд, ки мақсади ҳамоиш- инкишоф додани алоқаи корӣ байни соҳибкорон ва доираҳои тиҷоратӣ барои ҳамкории тарафайн миёни Чин ва Тоҷикистон дар бозорҳои ҳарду мамлакат, ҷалби сармоя, технологияи муосир ва таҷҳизоти Чин ба Тоҷикистон мебошад. Ин тадбир барои пешбурди тиҷорат, бастани шартномаҳои манфиатноки ҳамкорӣ, таъсиси корхонаҳои муштарак, ҷойҳои нави корӣ, баланд бардоштани сатҳу сифати зиндагии аҳолии ҷумҳурӣ мусоидат хоҳад намуд.
Дар ҳамоиш масъалаҳои рушди ҳамкорӣ дар соҳаҳои иқтисод ва тиҷорат, саноат, кишоварзӣ, инфрасохтор, гидроэнергетика, дорусозӣ, сайёҳӣ ва минтақаҳои озоди иқтисодӣ баррасӣ гардиданд.
Зимни ҳамоиш байни Палатаи савдо ва саноати Ҷумҳурии Тоҷикистон ва раёсати пешбурди савдои музофоти Хайнани Ҷумҳурии Мардумии Чин оид ба ҷалби сармояҳои Чин ба соҳаҳои афзалиятноки Тоҷикистон шартномаи ҳамкорӣ ба имзо расонида шуд.
