Дар посух ба изҳороти муфтии шаҳри Москва Альбир Крганов Шӯрои уламои Маркази исломии Тоҷикистон изҳор менамояд, ки ҳамкориҳои онҳо бо ниҳодҳои расмии динии Русия дар сатҳи хуб қарор дорад.
«Намояндагони Шӯрои уламо, аз ҷумла Раиси Шӯро Саидмукаррам Абдуқодирзода дар гузашта барои иштирок дар ҳамоишҳои динии Федератсияи Русия ба ин кишвар сафар карда, дар доираи он бо чанд гурӯҳе аз муҳоҷирони тоҷик низ дидору мулоқотҳо анҷом дода буд», – қайд мешавад дар ин робита дар сомонаи ин ниҳод.
Зимнан зикр мегардад, ки Шӯрои уламои Маркази исломӣ дар оянда низ бо истифода аз фурсатҳои фароҳам ҳамкориҳои худро тақвият хоҳад дод.
Ёдрас мекунем, ки муфтии Маскав Албир Крганов чанде қабл дар бораи хатари ба тундгароӣ гаравидани муҳоҷирони тоҷики муқими Русия бинобар сабаби ташкили гурӯҳи нави террористӣ дар марзҳои Тоҷикистону Туркманистон ва Афғонистон изҳори назар карда буд.
Ҳамчунин аз Кумитаи умуи дини ҷумҳурӣ дар ин робита хабар доданд, ки ояндаи наздик бо супориши ҳукумати Тоҷикистон як гурӯҳ имомхатибони тоҷик барои анҷоми корҳои пешгирӣ миёни муҳоҷирон ба Русия сафарбар мешаванд.
