Корбарони мессенҷери бештар писандида дар ҷумҳурӣ – Viber акнун дигар зангҳои аудио (овозӣ) ё зангҳои видеоӣ анҷом дода наметавонанд. Тариқи Viber акнун маълумотро метавон танҳо бо матн фиристод.
Айни замон қариб дар ҳамаи ширкатҳои операторони мобилӣ ва фароҳамсози интернет (провайдерон) ирсоли зангҳои овозӣ ё видеоӣ тариқи Viber ғайриимкон аст. Манбаъҳои «Азия-Плюс» дар якчанд ширкатҳои операторони мобилӣ, ҳамчунин корбарони шабакаҳои иҷтимоӣ низ ин хабарро тасдиқ мекунанд.
Зангҳои аудио ва видео тариқи Viber танҳо тавассути анонимайзерҳо, аз ҷумла замимаҳои бепули VPN имкон дорад, ки онро метавон баргирифта (скачать) ба телефон ва компютерҳо насб кардан зарур мебошад.
Тавре ба «Азия-Плюс» чанде аз манбаъҳо дар ширкатҳои операторони мобилӣ хабар доданд, қисман маҳдуд шудани истифодаи Viber аз ҷониби оператори миллии «Тоҷиктелеком» сурат гирифтааст, ки айни замон қариб ҳамаи провайдерон аз ин ширкат интернети магистралӣ мегиранд.
«Моро ҳанӯз чанд моҳ пеш вазифадор карда буданд, ки аз «Тоҷиктелеком» интернет гирем. Мо интихоби дигаре надоштем», – гуфт яке аз манбаъҳо.
Айни замон барномаи Viber мессенҷери писандидатарин дар Тоҷикистон шуморида мешавад. Зангҳои аудиои дигар мессенҷерҳо, аз ҷумла IOM, Telegram ва WhatsApp алҳол дастрас мебошанд.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
