Дар қароргоҳи СММ вазири корҳои хориҷии Тоҷикистон Сироҷидин Аслов дар ҷаласаи Шӯрои Амнияти СММ таҳти унвони “Эҷоди ҳамкориҳои минтақавӣ дар Афғонистон ва Осиёи Марказӣ ҳамчун намунаи пайвандсозии бехатарӣ ва рушд”, ки охири ҳафтаи сипаришуда таҳти раёсати Қазоқистон доир шуд, ширкат ва суханронӣ намуд.
Бино ба иттилои Вазорати корҳои хориҷии ҷумҳурӣ, дар ин ҳамоиш Дабири Кулли СММ, вазирони корҳои хориҷии Қазоқистон, Тоҷикистон, Узбекистон, Қирғизистон, Кувайт, Россия, Гвинеяи Экваторӣ, муовинони вазири корҳои хориҷии ИМА, Афғонистон, Нидерланд ва дигар намояндагони кишварҳои аъзои СММ ширкат ва суханронӣ карданд.
Сироҷиддин Аслов зимни суханронӣ таваҷҷуҳи иштирокчиёнро ба мушкилоти доғи рӯз дар минтақа, аз ҷумла бадшавии вазъ дар Афғонистон, афзоиши терроризми байналмилалӣ, экстремизми динӣ, ҷинояткориҳои муташаккили фаромиллӣ, қочоқи ғайриқонунии маводи мухаддир ва тағйирёбии муҳити зист ҷалб намуд.
Ӯ изҳор намуд, ки Тоҷикистон ҳамчун кишвари ҷонибдори ҳарчӣ зудтар барқарор кардани сулҳу амният дар Афғонистон тавассути рушди иқтисодӣ ва иҷтимоии он кишвар, бар он ақидааст, ки ҳамкориҳои минтақавӣ унсури муҳим дар таҳкими субот дар ин кишвари ҷангзада ва дар саросари минтақа мебошад. Барои ҳалли мушкилоти болозикр пиёдасозии иқдомоти қавитар тариқи тавсеаи ҳамкориҳо ва шарокати минтақавӣ зарур арзёбӣ гардид.
Зимни суханронӣ ӯ ҳамчунин аз ҷомеаи ҷаҳонӣ даъват ба амал овард, ки барои татбиқи пружаҳои иҷтимою иқтисодӣ дар ин кишвар, бахусус лоиҳаҳои минтақавӣ ба мисли КАСА-1000, ТУТАП ва ғайраҳо, ки барои рушди устувори Афғонистон заминаи муҳим мегузоранд, кумакҳои беғаразонаи худро дареғ надоранд.
Дар ҳошияи ҷаласаи Шӯрои Амнияти СММ Сироҷидин Аслов бо вазири корҳои хориҷии Ҷумҳурии Қазоқистон Кайрат Абдурахманов мулоқот карда, зимни вохӯрӣ ҷонибҳо масоили мубрами муносибатҳои дуҷонибаи Тоҷикистону Қазоқистон, инчунин таҳкими минбаъдаи ҳамкориҳои бисёрҷонибаи ду кишварро дар чаҳорчӯбаи СММ мавриди муҳокима қарор доданд.
Ҳамчунин вазири корҳои хориҷии Тоҷикистон бо муовини Дабири Кулл ва мудири Дафтари зиддитеррористии СММ Владимир Воронков вохӯрда, зимни мулоқот ҷонибҳо масъалаҳои ҳамкориҳои марбутаи Тоҷикистон бо сохторҳои зиддитеррористии СММ ва дурнамои рушди иқдомҳои якҷояро дар самти болозикр мавриди баррасӣ қарор доданд.
Дар ҷараёни суҳбат ҷонибҳо ҳамчунин ба масъалаи баргузории Конфронси байналмилалӣ оид ба мубориза бо терроризм ва ифротгароӣ, ки моҳи майи соли 2018 дар Душанбе баргузор мегардад, таваҷҷуҳ зоҳир намуданд.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
