Ба муносибати солҳои рушди деҳот, сайёҳӣ ва ҳунарҳои мардумӣ, Кумитаи дин, танзими анъана ва ҷашну маросимҳои ҷумҳурӣ ният дорад, ки маконҳои муқаддаси ёдгориҳои таърихиву динии кишварро обод созад.
Дар ин бора зимни нишастии матбуотии рӯзи 6 феврал раиси Кумитаи дин, танзими анъана ва ҷашну маросимҳои назди ҳукумат Сулаймон Давлатзода хабар дод.
Ба сифати мисол раиси Кумита мақбараҳои Мирсаид Алии Ҳамадонӣ (Кӯлоб), Мавлоно Яъқуби Чархӣ (Душанбе), Хоҷа Машҳад (Шаҳритӯс), Хоҷа Аҳрои Валӣ (ноҳияи Айнӣ)-ро номбар кард.
“Мутаассифона, шароити баъзе макони муқаддаси зиёрат дар кишвари мо номуносиб аст. Масалан, дар яке аз маконҳое, ки оромгоҳи шахсияти таърихист, дастархон ороста, ҷорво мекушанд. Дар бораи гигиена ва санитария фикр намекунанд”, – қайд кард ӯ.
Бино ба гуфтаи Сулаймон Давлатзода, айни замон Кумита ҳамаи чунин маконҳоро мавриди омӯзиш қарор дода, бо шароитҳои онҳо аз наздик шинос шуда истодааст.
“Айни замон мо ин ҷойҳоро зери назорат дошта, кӯшиш дорем, ки онҳо барои боздиди ҳам шаҳрвандони хориҷиву ҳам сокинони маҳаллӣ боз ва шароити муносиб дошта бошанд”, – илова кард Давлатзода.
Қобили зикр аст, ки солҳои 2019-2021 дар Тоҷикистон “Солҳои рушди деҳот, сайёҳӣ ва ҳунарҳои мардумӣ” эълон шудааст.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
