Дар остонаи моҳи шарифи Рамазон дар бозорҳои се шаҳри бузурги Тоҷикистон – Душанбе, Хуҷанд ва Бохтар болоравии нархҳо ба маҳсулоти мавриди ниёзи аввал оғоз шуд. Алҳол он қадр зиёд не, вале минбаъд чӣ мешавад, маълум нест…
Дар нархҳои маҳсулоти гӯштӣ ва меваҳои барвақтӣ (тезпазак) каме болоравӣ ба мушоҳида мерасад. Баъди боздиди намояндагони ҳукумати маҳаллӣ аз бозорҳову даъват ба боло набурдани нархҳо, сарусадоҳо дар бораи қиматшавии бархе маҳсулот, аз ҷумла гӯшту орд камтар шуд. Ба гуфтаи савдогарон, ҳозир дар бозори “Саховат” нархҳо ба варақаи нархномаҳо мутобиқ буда, дар “Деҳқон” нархномаҳо нестанд, вале нарх дар ин ҷо каме пасттар аз бозорҳои “Саховат” ва “Меҳргон” аст.
Дар Душанбе нархи гӯшт алҳол дар сатҳи 40 сомонӣ барои 1 кило боқӣ монда, дар минтақаҳо гаронтар аст.
.JPG)
ИЗОБРАЖЕНИЕ
Ҳанӯз чанд рӯз пеш 1 кило гӯштро дар Хуҷанд бо нархи 38 сомонӣ (гӯшти лаҳм – 50 сомонӣ) харидан имкон дошт, имрӯз нархи онҳо мутаносибан ба 40 ва 52 сомонӣ расидааст. Гӯшти гӯсфанд қаблан 48 сомонӣ нарх дошта, панҷ рӯз пеш аз моҳи Рамазон он бо нархи 50 сомонӣ фурӯхта мешавад. Нархи 1 кило гӯшти мурғи тару тозаи истеҳсоли маҳаллӣ аз 15-16 сомонӣ то ба 17 сомонӣ боло рафтааст.
Дар шаҳри Турсунзода низ гӯштфурӯшон нархи маҳсулоташонро аз 40 то ба 45 сомонӣ боло бурданд.
Дар шаҳрҳои Бохтару Кӯлоб низ гӯшти хуб аз 38-40 сомонии нархи пешина то ба 45 сомонӣ боло рафт.
Арзиши як халта орд (50 кило) дар шаҳрҳои Душанбе ва Хуҷанд тағйир наёфта, вобаста ба навъаш аз 155 то 180 сомониро ташкил медиҳад. Нисбат ба Душанбе ва Хуҷанд як халта орд дар шаҳрҳои Бохтару Кӯлоб ва Турсунзода 5-10 сомонӣ қиматтар аст.
Равғани растанӣ қимат нашуда, 10 сомонӣ барои 1 литр нарх дорад.
Биринҷи писандидаи навъи “кенҷа” як моҳ пеш 7-8 сомонӣ ва ҳозир 9-10 сомонӣ нарх дорад. Дар Душанбе он гаронтар аст. Биринҷи оддии таиландӣ ва чинӣ – 10 сомонӣ, “Юбилей” – 13 сомонӣ ва “Лазер” – 17 сомонӣ нарх доранд.
Дар Хатлон нархи тухм аз 90 дирами пешина то ба 1 сомонӣ барои 1 дона боло рафт.
Нарҳои сабзавоти барвақтӣ қариб тағйир наёфта, картошакаи ҳосили нав – 4 сомонӣ, 10 сомонӣ барои 3 кило; пиёз – 2,5-3,5 сомонӣ (ҳосили соли гузашта – 2 сомонӣ); сабзии ҳосили соли гузашта – 10 сомонӣ барои 3 кило, бандчаи ҳосили наваш (5 дона) – 4,5-5 сомонӣ нарх доранд.
Помидор бо нархи 14 сомонӣ фурӯхта мешавад. Пештар бо 12-13 сомонӣ харидан имкон дошт. Бодиринг баръакс аз 6-7 сомонӣ то ба 4,5-5 сомонӣ барои 1 кило арзон шуд.
Айни замон мева дар бозорҳо бештар дастрас буда, вобаста ба сифаташ як кило себ аз 2-3 сомонӣ то 5-7 сомонӣ нарх дорад. Даҳаи охир нархи 1 кило қулфинай (клубника) аз 12-14 сомонии пешин то ба 8-10 сомонӣ поин рафт. Дар бозорҳо гелос ҳам пайдо шудааст, ки 1 килояш 20-25 сомонӣ фурӯхта мешавад. Дар Душанбе нархи гелос аллакай то 15 сомонӣ поин рафтааст.
ИЗОБРАЖЕНИЕ
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
