Рӯзҳои 2-13 сентябр дар шаҳри Деҳлӣ (Ҳиндустон) вохӯрии навбатии кишварҳои иштирокчии Конвенсияи СММ оид ба мубориза зидди биёбоншавии заминҳо баргузор мешавад.
“Барои Тоҷикистон, ки дар конвенсия фаъолона иштирок мекунад, кори муштарак бо дигар кишварҳои Осиёи Марказӣ дар самти таҳияи тадбирҳо оид ба пешгирӣ ва коҳиши оқибатҳои хушксолӣ, ҳамчунин тӯфонҳои региву чангӣ хеле муҳим аст”, – гуфтааст Хелга Карстен, корманд оид ба маълумоти ҷамъиятии Конвенсияи СММ оид ба мубориза зидди биёбоншавии заминҳо.
Маълумотро дар бораи пешниҳодҳои Тоҷикистон дар вохӯриии ҷонибҳо ҳамоҳангсози миллии СММ дар Тоҷикистон Назар Абдураҳмонзода шарҳу тавзеҳ медиҳад.
Дар вохӯрии ҷонибҳо баррасии натиҷаҳои баҳодиҳии глобалӣ оид ба биёбоншавӣ дар назар аст, ки ба пешниҳод ва қабули ташаббусҳои нав, таҳияи лоиҳаву барномаҳо дар самти ноил гардидан ба тавозуни безарари биёбоншавии заминҳо имкон медиҳад.
Ҳамчунин масъалаҳои дигари муҳими рӯзномаи вохӯрӣ афзоиши саҳм дар таъмини амнияти озуқаворӣ, ҳалли мушкилоти тағйирёбии иқлим, пешбурди идоракунии оқилонаи замин, рушди муносибатҳои шарикии бисёрҷониба дар ин самт мебошанд.
Қобили зикр аст, ки на камтар аз 10%-и аҳолии сайёра дар заминҳои ба биёбон табдилёфта зиндагӣ мекунанд.
Дар Стратегияи миллӣ оид ба коҳиши хатарҳои офатҳои табиии Тоҷикистон барои давраи солҳои 2019-2030 қайд мешавад, ки тайи 22 соли охир бар асари офатҳои табиӣ ба ҷумҳурӣ дар ҳаҷми ним миллиард доллар зиён расонида шуд.
“Дар давраи аз соли 1994 то соли 2018 дар Тоҷикистон наздики 3460 ҳодисаҳои офати табиӣ рух дод, яъне ба ҳисоби миёна як офати табиӣ дар ҳар ду рӯз”, – зикр мегардад дар Стратегия.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
