Имсол 28-умин солгарди Истиқлолияти давлатии Тоҷикистон ҷашн гирифта мешавад. Дар ҳамаи шаҳру навоҳии кишвар ба ин муносибат баргузории сайругуштҳои оммавӣ, консерт ва дигар чорабиниҳои идонаи фарҳангӣ дар назар аст.
Қобили зикр аст, ки имсол дар ҷашни Истиқлолият шаҳрвандони ҷумҳурӣ се рӯз пайдарпай истироҳат мекунанд.
Мувофиқи қонун “Дар бораи рӯзҳои ид”, санаи 9 сентябр рӯзи истироҳат эълон шуда, рӯзҳои пеш аз ин – 7 ва 8 сентябр ба шанбе ва якшанбеи ҳафта рост меоянд.
Қарор ва изҳорот “Дар бораи Истиқлолияти давлатии Ҷумҳурии Тоҷикистон” санаи 9 сентябри соли 1991 дар иҷлосияи Шӯрои олии ҷумҳурӣ қабул шуда буд.
Чорабиниҳои асосӣ дар Душанбе бахшида ба ҷашн шоми 9 сентябр дар маҷмааи “Наврӯзгоҳ” доир мегардад: ба сокинону меҳмонони пойтахт бо иштироки ҳунармандони шинохтаи кишвар намоиши театришуда пешкаш мешавад.
Тавре ба “Азия-Плюс” як манбаъ аз дастгоҳи раиси пойтахт хабар дод, бо қарори шаҳрдори Душанбе дар ҳамаи ноҳия ва боғҳои фарҳангу фароғати пойтахт ба муносибати ин ҷашн чорабиниҳои идона баргузор гардида, воридшавӣ ба онҳо бепул хоҳад буд.
Ба муносибати ҷашн дар саросари кишвар даҳҳо иншооти гуногуни таъиноти иҷтимоиву иқтисодӣ мавриди баҳрабардорӣ қарор дода мешаванд.
Ҳамчунин рӯзи 9 сентябр бо иштироки президенти Тоҷикистон ба истифода додани агрегати дуюми нерӯгоҳи Норак пешбинӣ мешавад.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
