Сокини ноҳияи Восеъ Сайвалӣ Латифов дар синни 60-солагӣ донишҷӯ шуд. Ӯ имсол тариқи Маркази миллии тестии назди Президенти ҶТ аз рӯйи ихтисоси тарбияи ҷисмонӣ ҳамчун довталаб ҳуҷҷат супорид. Аз имтиҳонот сарбаландона гузашта, айни ҳол дар шуъбаи ғоибонаи факултаи тарбияи ҷисмонии Донишгоҳи давлатии шаҳри Кӯлоб ба номи Абӯабдуллоҳи Рӯдакӣ таҳсил дорад.
Ӯ бо ҳамсабақони аз худаш 40 сол хурд дар курсии донишҷӯӣ нишаста, дарс мехонад. Сайвалӣ Латифов ба “Азия-Плюс” гуфт, ки қаблан тасмим гирифта буд, соҳиби маълумоти олӣ шавад. Пас аз 41 соли хатми мактаби миёна барои амалисозии орзуи худ ҷаҳду талош карда, билохира ба номи донишҷӯ сазовор гардид. Вай афзуд, ки ба ин чандон бовар надошт, вале бахт ба рӯяш хандид.
Ин мард мегӯяд, рӯзҳои аввали дарс аз ҳамсабақони худ каме хиҷолат мекашид, чун онҳо хеле ҷавону пурэнержӣ буданд. “Баъдан одат кардам. Ба дарсҳо аз ҳама аввал ҳозир мешудам. Агар дар синфхона танҳо бошам, ягон донишҷӯй дарро боз карда, мепурсид: Устод, донишҷӯён куҷо рафтанд? Дар посух мегуфтам: О, ман худам донишҷӯям”, – бо ханда афзуд Латифов.
ИЗОБРАЖЕНИЕ Сайвалӣ Латифов бо ҳамдарсон.
Номбурда соли 1978 мактаби миёнаро хатм кардааст, вале он замон барои гирифтани маълумоти олӣ кӯшиш накардааст. Танҳо баъд аз иштирок дар давраи омӯзишии кӯтоҳмуддат ва гирифтани гувоҳнома ӯро ба ҳайси омӯзгори тарбияи ҷисмонӣ дар муассисаи таҳсилоти миёнаи умумии №14-и ноҳияи Восеъ ба кор қабул кардаанд. Тӯли ҳашт сол аст, ки дар мактаб ба ҳайси омӯзгор фаъолият дорад.
Ба гуфтаи ӯ, ҳамсабақии ҷавонон рӯҳияи тоза бахшида, ягон душворӣ дар таҳсил надорад.
“Ҳамсабақон ва омӯзгорон бо ман муносибати самимӣ доранд. Баъзе муаллимон аз банда ҳам хурдсолтар мебошанд. То ҳол боварам намеояд, ки донишҷӯ ҳастам ва орзуям амалӣ шуд”, – мегӯяд Латифов.
Мавсуф соҳиби 8 фарзанд ва 9 набера мебошад. Ба гуфтаи ӯ, фарзандон ва аҳли хонавода аз тасмими падар истиқболи хуб карданд.
Солҳои охир мушоҳида мешавад, ки афроди синни гуногун талоши гирифтани маълумоти олиро доранд. Аз суҳбати онҳо бармеояд, ки мақсадашон рӯ овардан ба зиндагии шоиста ва гузоштани саҳми бештари худро дар рушди ҷомеа мебошад.
Ёдовар мешавем, ки имсол ба Маркази миллии тестии назди Президенти Ҷумҳурии Тоҷикистон, ду довталаби калонсол ҳуҷҷатҳои худро пешинҳод карданд. Дар натиҷа Сайвалӣ Латифов бо холҳои бадастовардааш сазовори номи донишҷӯ гардид, аммо довталаби дигар – як хонум аз шаҳри Ҳисор дохил шуда натавонист.
Бино ба иттилои Маркази миллии тестӣ, соли гузашта нафари дигар – Меликмурод Қаландаров дар синни 60-солагӣ донишҷӯйи шуъбаи рӯзноманигории Донишгоҳи славянии Тоҷикистону Русия шуд.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
